MAPASALAMATON si Kongresista Vanessa ‘Vanvan’ C. Aumentado sa Segundo distrito sa Bohol sa Surgical Mission nga gihimo sa Philippine Gift of Life Foundation ubos sa pagpangulo ni Dr. Mary Ann Baluyot Ruiz ug sa International Academy of Medical Specialists Inc. (IAMS) kay pinaagi niini, nahiuli ang maayo nga panan-aw sa mga kaigsoonang Bol-anon nga adunay problema sa ilang mata pinaagi sa “Operation Klaro: Bohol Gift of Sight”.
Sumala sa babayeng magbabalaod nga gipanguluhan ni Dr. Federico A. Malubay ang surgical mission kauban nila ni Dr. Ronald Bell, President ug CEO sa Surgical Eye Expedition (SEE) International; Dr. Sean Collon, Himalayan Cataract Project; Dr. Madhavi Reddy, Director sa SEE; ug ang uban pang mga katimbang nila sa surgical mission.
Gipahigayon kini sa lungsod sa Ubay, sa Don Emilio Del Valle Memorial Hospital (DEDMH) sugod kaniadtong Disyembre 4 kutob sa Disyembre 8 niining tuiga.
Nasayran ni Aumentado nga dul-an sa 2,000 ka mga pasyente ang naatiman sa IAMS, gikan sa tulo ka mga distrito sa Bohol.
Samtang kauban usab sa maong Surgical Mission ang Provincial Gov’t of Bohol (PGBh) sa pagpangulo ni Gov Aris Aumentado diin dako ang pasalamat sa magbabalaod.
“Mapasalamaton ta sa PGBh kay sila pod atong partner/ka sponsor niini uban sa akong buhatan isip Kongresista ug dili lang ang operasyon ang libre ngadto sa mga pasyente, aduna usab kini mga libre nga tambal,’ sigon pa ni CongW. Vanvan.
Sangko usab sa langit nga pasalamat ni Aumentado sa tanan nga iyang katambayayong sa programa ilabina ni Mayor Costan Reyes uban sa tibuok LGU-Ubay; sa Medical Outreach Unit (MOU) sa PGBh; sa DEDVMH Doctors, Nurses, ug staff; sa mga HNU & UB Interns & students; sa Philippine Gift of Life Foundation sa pagpangulo ni Dra. Mary Ann Baluyot Ruiz; PNA- Bohol Chapter ubos ni Mam Melinda Pausanos; sa tanang sakop sa International Academy of Medical Specialist Inc. (IAMS); ang mga staff sa kongresista ug buhatan sa gobernador; volunteers ug sa mga sponsors; labi na usab ni Mr. Jun Cubarol sa vitamins ug eyeglasses. (RTB)
