GIKATAKDANG mosubasta og kapin sa 200 ka mga impounded vehicles nga kasagaran mga motorsiklo sa dili pa matapos ang tuig, matod sa usa ka opisyal sa Land Transportation Office (LTO) sa Tagbilaran City
Matod ni Yvonne Auza sa LTO Tagbilaran nga labing unang higayon nga mopahigayon ang ilang buhatan sa maong subasta.
Nagpadala na ang buhatan og pinal nga mga pahibalo sa mga tag-iya, nga naghatag kanila og higayon nga ma-claim ang mga sakyanan sa dili pa ang subasta diin ang maong mga sakyanan gi-impound gikan 2015 hangtod 2020.
Kini naglakip sa duha ka 4-wheel motor vehicles ug 30 ka motorsiklo nga na impound ug nakita sa LTO system.
Hinuon, namatikdan sa opisyal nga adunay 171 ka mga na-impound nga motorsiklo nga ang mga tag-iya wala sa sistema sa LTO ug bisan pa niini, ang maong mga sakyanan iapil usab sa subasta.
Nagduda si Auza nga ang maong mga sakyanan posibli nga na impound sa dihang manual pa ang mga transactions sa LTO ug sa panahon nga dili pa computerized ang encoding sa mga violations.
Dugang pa ni Auza nga bisan kinsa mahimong mosalmot sa subasta ug makabutang og bid.
Hinuon, ang bidding alang sa tibuok lote sa mga sakyanan nga ubos sa kustodiya sa LTO ug dili matag sakyanan.
Matod ni Auza, nagpaabot pa siya sa guidelines sa public bidding gikan sa ilang ulohang buhatan.
Ang mga kinahanglanon nga gikinahanglan alang sa mga interesado nga moapil sa subasta sa dili madugay imantala. (RTB)
