DUNAY mga tindahan dinhi sa Tagbilaran City nga walay saktong notisya o mga pahibalo kabahin sa mga katungod sa mga senior citizens ug mga persons with disabilities ilabi na sa ilang diskwento ug kadtong dili pwede ihatag kanila.
Si Konsehal Butchie Zamora II niduso og resolusyon nga naghangyo sa Business Permit and Licensing Office uban sa pakig-alayon sa Department of Trade and Industry nga hangyoon ang tanang balay patigayon sa dakbayan bahin aning mga pahibalo para sa mga kustomer nilayng seniors ug PWDs.
Gusto ni Zamora nga dunay ibutang nga mga notisya o paskin diha sa mga establisamento o sa cashiers booths bahin sa mga probisyon sa Republic Act 9994 ug RA 10754 mahitungod sa katungod sa mga senior citizens ug PWDs.
Sumala pa ni Zamora, angayan ipahumutang ang mga notisya ilabi na duol sa mga counters o reception area bahin aning 20 percent discounts ug VAT exemptions ubos sa maong mga balaod.
Kinahanglan sab nilang klaruhon ug ibutang ang kabahin sa ilang mga promo nga adunay pagtugot sa DTI, kun dili pwede magamit ang mga prebilihiyo ubos sa RA 9994 ug RA 10754, aron paglikay sa kalibog sa mga senior citizens ug PWDs nga usahay moinsister ug moresulta hinuon sa bikil. Ang maong lakang naghatag og kaayohan para sa mga senior citizens ug sa mga PWDs sa siyudad. (RTB)
