NANAWAGAN ang Tagbilaran City Police Office (TCPO) ngadto sa ilang mga sakop sa pagbadlong niadtong mga tawo nga manaygon sa kadalanan.
Matud pa sa kapolisan nga inay nga dakpon badlongon na lang ang manaygon sa kadalanan karong nagsingabot nga pasko kay peligro kaayo sa disgrasya ngadto sa mga manaygonay kay basin unya sila madasmagan.
Nasayran ning pamantalaan nga ipakatap sa kapolisan ang ilang mga patrollers nga molibot sa siyudad aron mamadlong sa mga manaygonay.
Samtang ang City Social Welfare and Development Office ang dunay desisyon sa pagpahigayon ug rescue operation ilabi na niadtong mga bata nga mamasko sa kadalanan.
Gipasalig sa TCPO nga andam ang kapolisan sa paghatag ug assistance sa CSWDO kun kini gikinahanglan. Hinoon tugtan ra sa kapolisan ang mga manaygon diha sa kabalayan.
Una niini gimando usab ni Tagbilaran City Mayor Jane Yap ngadto sa kapolisan nga hugtan ang pagbantay sa kahapsay ug kalinaw sa siyudad pinaagi sa pagpakatap sa kapolisan sa lain laing lugar sa siyudad. (RTB)
