ANG pagka-opisyal o pagka-lider sa barangay ilabina kon pinili, nagkinahanglan og pagkatawo nga anaay kredibilidad ug kasaligan.
Busa, kon ikaw nagpapili ug napili, siguruha nga limpyo ang imong rekord o dili maghugaw-hugaw niini.
Ang Philippine Drug Enforcement Agency (PDEA)-7 niingon nga maniid sila sa mga nidaug sa Barangay ug Sangguniang Kabataan Elections (BSKE) 2023 kaniadtong Oktubre 30.
Nakakuha og impormasyon ang taga-PDEA nga sa mga nagpapili kaniadtong niaging buwan, anaay mga nalambigit sa illegal nga kalihukan sa illegal nga drugas.
Apan paghuman sa Piniliay, nasuta nga napildi ang maong mga kandidato nga anaay kalambigitan sa illegal nga duwa.
Hinuon, nidugang ang maong ahensya nga ila pa’ng utingkayon kon ang mga nidaug ana-a ba’y nagduwa sa maong illegal nga tambal.
Sakto ang lakang sa maong ahensya nga masiguro nga ang mga mo-alagad sa barangay gikan sa SK kagawad hangtud sa Kapitan, walay kalambigitan sa ginukod nga kalihukan.
Kay kon ang maong mga lider sa barangay nagduwa sa illegal nga tambal, dako og puruhan nga ma-impluwensyahan ang katawhan ilabina ang kabatan-onan.
Bantayanan ang maong guinadiling kalihukan ilabina giangkon sa ubang opisyales sa Philippine National Police (PNP) nga hinay ang kampanya batok illegal nga drugas sa administrasyong Marcos Jr.
Sa mga nigawas nga taho sa ubang kabarangayan sa lalawigan sa Bohol, ana-a kuno’y mga nalambigit sa guinadiling drugas nga gipili sa katawhan. Ang uban, drug surrenderees pa, butang nga nagkinahanglan og igong pagtagad kon unsa ang ilang mahimong liderato.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
