GIHAN-AY na karon sa Commission on Elections (Comelec) ang contingency plan alang sa umaabot sa May 9, local ug national elections hilabina may kalabotan sa supply sa kuryente ug signal sa mga polling centers sa tibuok probinsya.
Matud pa nga nahinabi na sa buhatan ang Department of Energy (DOE) kalabot niini hilabina nga padayon pa ang recovery effort gikan sa pagkusokuso sa bagyong Odette niadtong Disyembre sa niaging tuig.
Hinuon dunay backup batteries ang mga vote counting machines kun mag brownout matud pang sa Comelec Bohol.
Kun walay signal sa usa ka polling center, ang mga electoral board mangita og paagi aron nga ma transmit ang data o resulta gikan sa VCM o mas maayo moadto na lang sa munisipyo alang sa pag transmit sa resulta sa balota, dugang sa buhatan.
Samtang gipasidan-an usab ang mga kandidato kalabot sa Section 20 sa Comelec Resolution No. 1048 o pagdili og butang sa mga campaign materials sa mga poste, waiting sheds, ug uban pa nga government-owned properties ingon man sa mga punoan sa kahoy. (RTB)
