SA padayong pagkaylap sa mga nagpahisalaag nga mga impormasyon kabahin sa nagkalain-laing personalidad sa tradisyunal, social, ug uban pang matang sa media, nagpahinumdom si Kongresista Erico Aristotle “Aris” Aumentado sa Segundo Distrito sa Bohol sa mga Bol-anon nga magbinantayon sa mga taho nga gipakatag sa tibuok probinsiya.
Nagpagawas og pahayag ang kongresista, nga biktima usab sa sayop nga impormasyon gikan sa iyang mga kritiko nga kaalyado sa kasamtangang panggamhanang probinsyal, nga naga-awhag sa tanan nga susihon ang mga impormasyon nga madawat gikan sa nagkalain-laing matang sa media, aron katong mga matinud-anong lamang nga mga balita ang atong hatagan og pagtagad.
“Samtang nagkaduol na ang piniliay, magkadaghan sad ang mga isyu nga ilabay sa mga kandidato nga mudaganay karong Mayo 2022. Busa, ako naga-awhag sa tanang mga Bol-anon nga magbinantayon kita sa mga gipakatag nga mga balita. Adunay uban nga tinuod, aduna say uban nga gigama-gama ra ug intensyon ra nga mangdaot ngadto sa uban,” matod pa sa mambabalaod.
Dugang pa, nikomento usab siya nga ngadto lamang sa mga makasaligan nga mga media outlets musalig ang katawhan ngadto sa ilang impormasyon og kinahanglang i-double check ang bisan unsa mang impormasyon nga naggikan sa mga kwestiyonable nga mga social media pages.
“Nanghinaot ako nga pinaagi niining maong mga pahimangno, matabangan kita nga ang kamatuoran lamang ang atong ipatigbabaw ug dili kita maimpluwensyahan sa mga sayop nga mga balita,” dugang pa sa kongresista sa higayong iyang gitapos ang maong pamahayag. (PR/jja)
