TAGBILARAN CITY, Bohol (PIA) — Gikan sa Enero 2023 hangtud sa Oktubre 15, 2023, mikabat sa 82,617,892.00 nga gibanabana nga bili sa 12,149.69 ka gramos nga illegal nga substance nga shabu o Methamphetamine ang nahipos sa tinugyanan sa Philippine Drug Enforcement Agency, Philippine National Police, National Bureau of Investigation ug uban pang kaalyado nga tigpatuman sa balaod, dinhi sa Bohol.
Ang methamphetamine, o mas nailhang illegal nga drugas nga shabu, usa ka matang sa drugas nga nahilakip sa mga controlled substances tungod sa dili maayong epekto niini sa tawo nga mogamit.
Ang methamphetamine nga gimugna gikan sa amphetamine, nahimo nang gamhanang drugas nga makapatuyok sa hunahuna sa mogamit, hangtud nga mopilit siya sa paggamit niini, nga matag adlaw siya nga itumod ngadto sa kamatayon.
Ang 12 ka kilos nga shabu nga nasakmit, gibanabana nga mokabat na ngadto sa P82,747,892 milyones, segun pa sataho sa Kampo Dagohoy, ang kampo sa Philippine National Police.
Kini usab nga taho gidasonan ni PDEA Intelligence Officer ug narcotics agent Ferdenand Kintanar, didto sa labing bag-o nga PPOC meeting sa milabay nga semana.
Subay sa datus sa kapolisan, ang mga drugas nga nasakmit sa Hunyo ug Hulyo, kanus-a gilantaw nga mokusog ang halin tungod sa mga kalihukan sa Sandugo, nagpakita nga dinhi usab ang sulbong sa pagkasakmit sa illegal nga drugas.
Sa Hulyo, 2.3 kilos ang shabu nga nasakmit samtang sa Hulyo, mikabat sa 3.8 kilos usab ang nakuha.
Katunga sa kadaghanon sa drugas nga nakuha sa mga tinugyanan, nakuha niini nga duha lamang ka buwan nga nahisgutan, base sa taho sa Kampo Dagohoy.
Sa buwan sa Hunyo, nahipos ang 2,366 ka gramos nga nagkantidad og P16,230,172.00 samtang sa Hulyo, miabut sa 3,883.98 ka gramos nga mokantidad og P26,417,864.00 ang nahipos.
Mikabat sa 42,648,036 ka milyon ang bili nga mobaha usab unta sa kadalanan sa Bohol niadtong tingSandugo, kon wala pa masakmit.
Kining tanan, resulta sa 487 ka mga operasyon sa nagkahiusang bahan sa mga tinugyanan sa tigpatuman sa balaod, segun pa ni Police LtCol Joseph Berondo, deputy chief for operations sa Bohol Provincial Police Office, didto sa PPOC.
Sa nahisgutan nga mga operasyon, mingposas usa sa 31 ka mga giila nga dagko’ng drug personalities nga gitawag sa kapolisan og High Value Individuals, ug 520 ka mga gagmay nga gamut sa patigayon sa ilegal nga bisyo. (RAHC/PIA-7/Bohol)
