NASIKOP atol sa buy-bust operation sa kapolisan ang suspetsado sa pagpanglugos og 69-anyos nga senior citizen, insidente nahitabo didto sa Barangay Buacao, Lungsod sa Clarin.
Base sa taho sa kapolisan nga giingong duha ka higayon giamong-amongan sa suspetsado ang biktima ug ang unang insidente nahitabo niadtong Oktubre 29, 2023 sa ala 1:00 sa kadlawon dihang nitubag sa sugo sa lawas ang senior citizen.
Ang suspetsado nakasulod kini sa balay sa biktima ug giingong gikuptan ang kamot sa naulahi gibitad sa kwarto ug didto giamong-amongan. Ang suspetsado giingong namahad sa biktima nga patyon niya kini kong magsaba ug dayong sibat.
Nasayran nga ang biktima nag-inusara lang kini sa iyang balay. Apan pagka-alas 3:00 sa kadlawon sa samang adlaw nibalik ang suspetsado sa panimalay sa biktima ug giamong-amongan na usab kini.
Ang biktima uban sa iyang mga kabanay ni-report sa maong hitabo sa Clarin Municipal Police Station.
Nasuta nga ang suspetsado walo ka tuig kini nga napriso tungod sa kasong Arson ug Violence Against Women and their Children (VAW-C) ug nakagawas kini gikan sa prisohan duha ka buwan ang nakalabay.
Ang kapolisan nakadawat og report nga ang suspetsado nalambigit kini sa ilegal nga drugas hinungdan nga ang Clarin Municipal Police Station nipahigayon og buy-bust operation batok sa suspetsado.
Ang suspetsado nasikop sa mga polis didto sa Barangay Poblacion Centro sa maong lungsod ug nasakmit gikan kaniya ang 16 gramos nga shabu nga nikantidad ngadto sa P108,800.
Gituohan sa kapolisan nga ubos sa impluwensiya sa ginadiling drugas ang suspetsado dihang giamong-amongan niini ang biktima.
Ang suspetsado mag-atubang kini og tukmang kaso sa nahimo niya nga kalapasan. (RTB)
