TAGBILARAN CITY, Bohol PIA) — Mas daghan na nga mga kabus nga nasakop sa Pantawid Pamilyang Pilipino Program (4Ps) labi na kay giuswag na ang pagpatuman sa bag-o nga ayuda nga tanyag sa Department of Energy (DOE) nga ipatuman usab sa Department of Social Welfare and Development (DSWD).
Kini maoy napagawas nga kasayuran gikan ni National Household Targeting System (NHTS) Head Lester Laborte didto sa Kapihan sa PIA nga ngapadayag sa bag-ong programa nga Lifeline Rate Subsidy (LRS) sa kagamhanan.
Ayuda nga dili hinuon ma-kwarta, ang lifeline subsidy rate mahimong i-diskwento ug ikaltas sa balayranan sa suga, nga magsugod sa Enero 2024 na.
Giseguro na niini ang mga aktibo nga sakop sa 4Ps ilabi na sa nakapasar sa Listahanan 3 o ang NHTS alang sa Poverty Reduction, mahimo usab nga makaapil niini kadtong nalista sa NHTS PR apan wala maapil sa Listahanan 3 bisag kabus, matud ni Laborte.
Kahinumduman nga una na nga gi-target sa kagamhanan nga makasugod ang LRS niadto pang Agosto, unya gisibog sa Septembre 2023.
Niining bag-o lang, gipagawas na usab sa kagamhanan nga ang pagimplementar sa programa magsugod na sa Enero 2024.
Tungod niini, mas madaghan pa ang mga kabus nga mahimong matabangan sa ilang mga bayronon sa koryente tungod sa pag-uswag nga makahatag kanila sa kahigayunan nga makaparehistro sa programa.
Nakit-an usab sa kagamhanan nga ubos pa ang narehistro sa nahisgutang ayuda, mao nga naka-ayo pa gani niini ang pag-uswag sa implementasyon.
Ang DOE, Energy Regulatory Commission, ug ang DSWD niining bag-o lamang, minglagda sa kasabutan sa pagpa-uswag sa pagpatuman sa subsidiya sa tumong nga mas daghan pa unya ang makaapas sa pagparehistro alang niining benepisyo.
Makakuha sa benepisyo kadtong mga sakop sa 4Ps nga mokunsumo ug dili molapas sa 100 kWh (kilowatt hour) nga reading sa ilang metro, aron makakuha sa kaltas nga katumbas sa piila ka prosyento nga diskwento, depende usab sa kadak-on sa ilang konsumo, gipasabut ni Laborte.
Subay sa Republic Act (RA) 11552, o ang Act Extending and Enhancing the Implementation of the Lifeline Rate, nga nagpabag-o sa Section 73 sa RA 9136 o the Electric Power Industry Reform Act, ang LRS maoy pagpatuman niini.
Segun pa usab sa DOE, 47,171 pa lamang ang nagparehistro sa lifeline program taman Agosto 30.
Alang sa programa, makaapil niini ang sakop sa 4Ps, kinsa kinahanglan pa usab nga mo-apply pinaagi sa pag-fillout sa application form nga anaa sa mga buhatan sa ilang power distributors, dala na usab ang labing bag-o nga bill sa koryente.
Dinhi sa Bohol, ang Bohol Electric Cooperative I, Bohol Electric Cooperative II ug ang Bohol Light Company Incorporated lamang ang mga power distributors sa Bohol.
Kon wala malakip sa 4Ps, mahimo pa gihapon nga makabenepisyo sa programa kon kabus ug makakuhag certification gikan sa Local Social Welfare and Development Officer ug makapakita og ID nga iya nga gihatag sa goberno, hinungdan usab nga kinahanglan nga rehistrado sa Philippine Statistics Authority ang buot moapil apan dili maka qualify sa Listahanan 3.
Kon maaprobahan ang registration sa mga Distribution Utilities, mahimo na nila nga makakuhag diskwento sa bayad sa koryente sugod Enero 2024. (RAHC/PIA-7 Bohol)
