BISAN ang imong kaugalingon, ayaw patya, ayaw hunosi ang imong kinabuhi. Dili man kita ang nagmugna niini, ang Dios man, ang atong Magbubuhat. Busa, wala kitay katungod mohunos niini.
Importante kaayo kining maong mensahe, ilabi na taliwala sa grabeng pinatyanay sa gubat. Gubat sa Hamas ug sa grupo ni Netanyahu, gubat sa Russia ug Ukraine, ug panagbangi sa China ug Pilipinas sa pagpangilog sa mga Komunistang Insik sa atong teritoryo diha sa West Philippine Sea. Grabe ang ilang paghulga sa atong nasud.
Kabahin sa paghikog o suicide. Tingale dili lang kitang mga Bol-anon ang nahiagum niini. Wala usab magpasagad ang mga awtoridad. Apan naglisud sila pagsulbad sa maong gumonhap.
Unsa may ilang mahimo? Busa ang Simbahan milihuk na tungod kay tataw man nga kini usa ka ispirituhanong suliran. Mipagawas ang Simbahan sa usa ka Sulat Pastoral ug Oratio Imperata isip ispirituhanong hinagiban o pamaagi paingon sa kasulbaran.
Daghang mga hinungdan ang nagpatung-patong hangtud nga kini misangput sa paghikug. Kini nagagikan sa sayup nga panghunahuna ug emosyon, nga miresulta sa aksyon sa paghunos sa kaugalingong kinabuhi.
Dayag na lang nga ang niaging lider sa atong nasud nga sagad mosulti nga daw dili bililhon ang kinabuhi, ilabi na sa mga pobre, mga drug users, ug kababayen-an nakasamut gayud niining maong sitwasyon. Ang ordinaryong tawo dali rang maimpluwensyahan sa panghunahuna nga way bili ang kinabuhi ug basta na lang hunusan.
Apan dili lalim kining maong isyu. Kung ang mga eksperto sa panglawas ang pangutan-on mohisgut sila kabahin sa Depression. Matud pa nila, ang tawong naghikug, depressed o gibati sa tumang kaubos sa paglantaw sa kaugalingon.
Alang kanato, dili lamang kini Depression kon dili, kini usa na ka Desperation. Desperado na ang tawong naghikug. Alang kaniya wa nay kapuslanan ang tanan.
Kini nagpasabut nga wala gayud matugkad sa tawong naghikug ang mensahe sa atong Ginoong Hesu Kristo. Dili kita magsasangyaw, apan usa ka batakang pagtulun-an sa atong Kristohanong pagtuo nga “ang pagpas-an sa atong krus sa inadlaw-adlaw natong kinabuhi mao ang dalan paingon sa ispirituhanong kahimayaan”.
Kita mismo nakigbisug pa sa atong mga kaugalingong kahuyang ug kasaypanan, apan kining tanan tipik lamang sa atong kalbaryo. Sa Binol-anon pa natong pagkasulti: Wa ras kumajingking sa kalbaryo ni Ginoong Hesu Kristo ang atong mga gisagubang.
Pas-an lang tas atong krus. Di lang ta mopatay, bisan sa atong kaugalingon. Og bug-at na jamo atong gisagubang, ato kining itugyan sa atong Ginoo. Atong i-surrender Kaniya ang tanang dili na nato makaya pagpas-an.
“Lord, sa imong mga kamot itugyan namo ang tanan”.
