MAGPABILING mohimo og agresibong police operations ang Police Regional Office(PRO)-7 batok sa mga grupo nga nalambigit sa mga shooting incidents aron dili sila makabalda sa kahapsay ug kalinaw sa Central Visayas.
Kahinumduman sa Lalawigan sa Bohol duha ka grupo ang napuhag sa kapulisan dihang nagpahigayon sila og buy-bust operation ug nasuta sa kapulisan nga sila nalambigit sa mga pagpamusil dinhi.
Gani gawas sa illegal nga druga nakuhaan sab sila og mga nagkalain-laing kalibre sa armas.
Matud sa tigpamaba sa Police Regional Office-7 Director Brigadier General Anthony Aberin nga si Police Lt. Col. Gerard Ace Pelare nga dili lang dinhi sa Bohol ang ilang agresibong Police Operations apan apil na sab ang ubang lugar sa rehiyon.
FULL ALERT
SUGOD karong adlawa full alert na ang kapulisan sa Police Regional Office (PRO)-7 subay na sa Barangay ug Sangguniang Kabataan Elections nga mahitabo ugma Oktubre 30, 2023.
“Ang atong tanang security forces who are to be deployed will already be in the respective assignment,” sigon ni Pelare.
Matud ni Pelare, Agosto pa sila nangandam sa BSKE ug base sa ilang intelligence monitoring hapsay ug malinawon nga ipahigayon ang eleksyon.
“The assurance of Police Regional Office-7 to the public is we have strategized the deployment, wala lang ta nagtan-aw sa Barangay ug SK election wala sad nato biyae atong ordinary ug usual police function, ang atong police function magpabiling aktibo, naay mga tawo nga na-assign para mo responde sa mga non-related election responses,” matud ni Pelare.
Matud sab ni Pelare ang Barangay Cansomoroy sa Lungsod sa Balamban gipaubos sa election areas of concern human nasuta nga ang pagpusil patay sa usa ka kandidato sa pagka kapitan, election-related incident nagpadala dayon sila og request sa Regional Joint Security Coordinating Center nga madeklarar ang barangay ubos sa election areas of concern.
Gilauman sa kapulisan nga modagsa ang mga tawo sa mga terminal ug pantalan kay manguli sa tagsa-tagsa nila ka mga Probinsiya sila nagpahinumduom nga planuhon og sakto ang pagbiyahe aron malikayan ang mga kakulian.
690 KA ARMAS
GIPASIGARBO sa kapulisan sa Central Visayas (CV) nga moabot na sa 690 ka mga armas ang ilang nasakmit sa nagkalainlain nga operasyon sukad sa pagsugod sa election period niadtong Agusto 28, 2023 alang sa Barangay and Sangguniang Kabataan Election (BSKE) ugma Lunes, Oktubre 30, 2023.
Matod ni Pelare, nga kasagaran nakuha ang maong mga armas, nga naglakip sa mga deadly weapon sama sa kutsilyo ug uban pa, atol sa Comelec checkpoints ug police operations.
Kini nagpasabot, matod ni Pelare, nga ang kapulisan sa CV seryuso sa ilang kampanya sa pagkuha sa loose firearms alang sa luwas, hapsay, malinawon ug matinud-anon nga BSKE.
Una nang nipagawas og kamandoan si Aberin sa iyang mga sakop nga patutukan ang operations batok sa loose firearms subay sa pagpangandam sa election sa barangay.
Lakip sa ilang gipanggukod karon ang mga gun for hire nga posibling magamit sa eleksiyon ugma Lunes. (RTB)
