SUBAY sa kalihukan sa adlaw sa mga santos ug kalagkalag 2023, ang Bureau of Fire Protection (BFP) Bohol nilusad usab sa ilang programa nga ‘Oplan Kaluluwa’ uban ang mga nagkadaiyang ahensya sa gobiyerno kini bisan paman og di pasudlan og tawo ang mga sam-ang tungod sa pandemiya.
Matud pa sa BFP-Bohol nga paghingusog kini sa kampanya sa kabomberohan tibook nasud nga malikayan ang sunog ning pagtimaan sa mga mahinungdanon nga adlaw.
Sumala pa sa BFP-Bohol nga base sa datos nga ilang nahipos ang kasagaran nga hinungdan sa sunog panahon sa pag-obserbar sa kalagkalag mao ang dili mabantayan nga mga nangaupos nga kandila nga gipahinungod sa mga kalag sa mga tagbalay diha sa ilang mga altar.
Aron malikayan ang sunog aduna silay mga safety tips nga kinahanglan pagngon ang mga appliances kung wala na kini mga gamit, kinahanglan ipagawas sa mga panimalay ang mga butang nga dali ra kaayo masunog, sama sa gasolina, kerosene, pintal ug uban pa.
Sigurohon usab ang mga kandila nga gidagkotan layo sa mga kurtina, mga papel o karton ug dili angay ibutang sa mga plastic nga butanganan.
Gitug-an sa buhatan nga kung dili malikayan nga mobakasyon ang pamilya sulod sa pipila ka adlaw sigurohon nga ang mga LPG regulator, ug LPG hose anaa sa saktong kondisyon aron malikay ang paghungaw niini.
Malaumon ang kabomberohan nga taliwala niining panahon sa pandemya nga nasinati, kanunay unta nga mag-amping ang tanan aron malikayan ang sunog. (RTB)
