NAGPADAYAG sa kabalaka ang inahan sa lungsod sa Catigbian kabahin sa mga biktima sa kapintas sa panimalay nga nagpasaka sa kaso batok sa mga nakasala. Kini atol sa usa ka forum agig pagsaulog sa National Women’s Month karong buwana sulod sa balay-lungsod.Nanawagan si Mayor Abeth Mandin sa pamilya sa mga biktima sa kabangis batok sa mga kababayen-an ug mga bata sa dili pagbakwi sa kaso batok sa nangabuso kanila.
Giasoy ni Mandin nga ang mga biktima mahimong mapugos sa dili paghinayon sa ilang kaso kung ang miabusar kanila adunay mahinungdanon nga papel sa ilang kinabuhi, ilabi na kung ang bana mao ra ang gigikanan sa suporta alang pamilya.
Bisan pa niini, giingon sa babayeng mayor nga sa bisan unsang kalapasan, ang kasaligan nga testimonya sa biktima hingpit nga kritikal alang sa pagpasaka sa kaso.
Gipasabot ni Mandin nga importanti ang pagtahod sa katungod sa kababayen-an ug kabataan tungod kay gipanalipdan sila sa balaod ubos sa R.A. 9262 kon Violation Against Women & Children Act ug walay ingon nga balaod ang mga kalalaken-an. (RTB)
