DILI na espesyal nga pista opisyal ang People Power Edsa Revolution base sa bag-ohay gipagawas nga listahan sa mga public holidays sa Pilipinas sa sunod tuig.
Si Presidente Ferdinand Marcos Jr. mipirma sa Proclamation 3268 nga nag-ila sa mga regular holidays ug special non-working holidays para sa sunod tuig 2024.
Samtang wala pa iapil ang Islamic holidays sama sa Eid’l Fitr ug Eid’l Adha kay mag-agad kini sa eksaktong adlaw nga gidiktar sa Islamic calendar. Ang maong adlaw saulogon matag Pebrero 25 diin daghang mga demonstrasyon nga makita diha sa kadalanan nga giorganisar dili lang sa mga militanteng pundok kondili hasta sab sa mga lokal nga kagamhanan.
Nahimong pista opisyal ang maong adlaw sa panahon ni kanhi presidente Joseph Ejercito Estrada aron pagtimaan sa makasaysayanong rebolusyon nga nagpalagpot sa amahan sa kasamtangang presidente nga si kaniadto diktador presidente Ferdinand Marcos Sr.
Ang amahan ni Marcos nga si Marcos Sr., gihulagway nga usa ka diktador ug ang pagdeklarar niya og Martial Law gikonsiderar nga labing mangitngit nga bahin sa kasaysayan sa nasud tungod sa mga human rights abuses ug kurapsyon nga nakapa-pobre og maayo sa nasud.
Sa paglingkod ni Marcos Jr. daghan ang nagtuong wagtangon na niya ang maong public holiday, apan iyahang gisibog ang petsa ngadto sa Pebrero 24 ning tuiga nga natunong sa adlaw nga Biyernes.
Apan sa bag-ong presidential proclamation bahin sa holidays sa Pilipinas karong sunod tuig 2024 nga penetsahan og Oktobre 11 ug gipagawas niadto lang Biyernes, wala mahisgoti didto ang People Power Revolution.
Hinuon saulogon pa gihapon sa sunod tuig ang death anniversary ni kanhi senador Benigno “Ninoy” Aquino sa Agosto 21. Si Aquino ug ang iyang kapikas nga si kanhi presidente Corazon Aquino maoy giila nga maoy nangusog aron mabalik ang demokrasya sa Pilipinas gikan sa diktadoryang Marcos.
Ang Malacañang nipagawas og pamahayag bahin sa Edsa People Power Revolution nga nag-ingon nga ang Pebrero 25 sa 2024 natunong og adlaw nga Domingo ug dili kaayo apektado ang mga trabaho sa mga tawo, rason nga wala na kini iapil.
Apan nasayran nga ang Feast of the Immaculate Conception of Mary sa Disyembre 8, 2024 natunong sab sa adlaw nga Domingo, naapil gihapon sa Special non-working holidays. (RTB)
