LAYO pa kon buot hunahunaon ang presidential elections sa 2028 — upat (4) pa ka tuig kapin gikan karon.
Apan nanggimaw na ang duha ka mga dagkong ngalan nga posibleng maglumba sa pinakataas nga posisyon sa gobyerno o politika sa Pilipinas.
Laing apan, ana-a na’y namolitika, klarong lakang sa pamolitika — si House Speaker Ferdinand Martin Romualdez, ig-agaw og tagsa ni Presidente Bongbong Marcos Jr.
Sa unsa ba’ng lakang makaingon kita nga namolitika na og sugod si Speaker Romualdez?
Gihatagan og “zero” nga “confidential funds” alang sa 2024 budget ang Buhatan ni Bise-Presidente Sara Duterte lakip ang Department of Education (DepEd) nga iyang gigunitan isip kalihim niini.
Ang ubang mga “civilian agencies” sama sa Department of Agriculture (DA), Department of Information and Communications Technology (DICT) ug Department of Foreign Affairs (DFA), wala usab gahini sa susamang pundo.
Apan si Romualdez anaay P1.6 bilyones nga confidential funds ug si Senate President Juan Miguel Zubiri anaay P331 milyones nga confidential funds.
Sa mga ahensiya nga gilabnutan og confidential funds, ang OVP ug DepEd maoy klarong gipunting og ayo, sa pagka-ngan nga si VP Sara maoy dakong hulga sa Piniliay pagka-Presidente karong 2028.
Mao usab kini ang nakita sa amahan ni VP Sara nga si kanhi Presidente Rodrigo Duterte sa gibuhat ni Romualdez.
Niingon si Digong sa usa ka episode sa “Gikan sa Masa, Para sa Masa” sa SMNI News, nga ang “Philippine Congress” maoy “most rotten institution” sa nasud. Lata na kaayo sa korapsyon.
Si kanhi Kongresista ug kanhi tigpamaba sa Presidente nga si Atty. Harry Roque, niingon usab nga dili sila makatarug ni Inday Sara tungod kay nagbuhat kini sa iyang trabaho sa limpyo ug walay isyu sa korapsyon.
Matud sa usa ka inilang manunuwat ug loyalista sa mga Duterte nga:
“…No amount of sugar-coating can deny that Romualdez has now burned his bridges with Duterte.
A clever enemy would stab in the back, but this single act by a mere congressional committee to sequester Duterte’s funds is a frontal assault any way one looks at it.”
Si Presidente Bongbong nahibawo sa lakang ni Romualdez kay ig-agaw man sila apan nagpakahilom.
Samtang si Inday Sara puno sa pasensya ug nagpaniid lang sa mga panghitabo, sama sa usa ka utukang agila.
Layo pa ang 2028. Daghan pa ang posibleng mahitabo. Daghan pa’ng tuyok-tuyok sa kalibutan sa politika. Ug ang angayang buhaton sa mga lider sa gobyerno, mao ang pagtinabangay nga masulbad ang mga dagkong suliran sa nasud Pilipinhon karon.
Apan kay dili man gayud kalikayan nga anaay mga mamolitika alang sa ilang interes sa umaabot, ang katawhan na ang mohukom inig abot sa maong takna.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
