METRO MANILA (PIA) — Gimanduan ni Presidente Ferdinand R. Marcos Jr. ang mga local government units (LGUs) sa pagsuspenso sa pagkolekta sa “pass-through fees” aron maseguro ang episyente nga paglihok sa mga butang sa tibuok rehiyon nga nahisubay sa mga estratehiya sa gobyerno sa pagpalagsik sa mga lokal nga industriya ubos sa Philippine Development Plano 2023-2028.
Ang tulo ka pahina nga Executive Order No. 41 nga gilagdaan ni Executive Secretary Lucas P. Bersamin niadtong Setyembre 25 nag-ingon nga ang tanang LGUs gidid-an sa pagpangolekta og toll fees ug charges sa tanang motor vehicles nga maghakot og mga butang o mga baligya samtang moagi sa bisan asang nasudnon nga mga dalan ug uban pang mga dalan nga wala gitukod ug gipondohan nila.
Gipasiugda sa EO nga ang dili awtorisado nga pagpahamtang sa pass-through fees adunay dakong epekto sa mga gasto sa transportasyon ug logistik, nga sagad ipasa ngadto sa mga konsumidor, kinsa sa katapusan nagpas-an sa palas-anon sa pagbayad alang sa pagsaka sa presyo sa mga panaliton.
Gihatagan usab og gibug-aton sa EO nga ang pagkunhod sa gasto sa transportasyon ug logistik usa sa mga haligi sa 8-Point Socioeconomic Agenda sa administrasyong Marcos.
Aron epektibong ipatuman ang EO, ang Department of Interior and Local Government (DILG) gimandoan sa pagkuha og mga kopya sa kasamtangan nga mga ordinansa sa tanang LGUs sa pagkolekta sa pass-through fees nga gipahamtang sa mga sakyanang de-motor, lakip na kadtong gi-isyu subay sa Section 153 ug 155 sa Republic Act No. 7160, nailhan usab nga Local Government Code of 1991, sulod sa 30 ka adlaw gikan sa pagka-epektibo sa EO.
Ang EO magaepekto dayon sa pagmantala niini sa Official Gazette o sa usa ka pamantalaan nga adunay kinatibuk-ang sirkulasyon.
Ang Department of Trade and Industry (DTI), Department of Transportation (DOTr), Department of Public Works and Highways (DPWH), Anti-Red Tape Authority (ARTA), ug ang Department of Finance (DOF) mosusi sa mga ordinansa nga makuha sa DILG aron masiguro ang pagsunod niini sa RA 7160.
Ang pagkapakyas sa pagsunod sa mga direktiba ipaubos sa administratibo ug pagdisiplina nga mga silot batok sa masalaypon nga mga opisyal o empleyado sa publiko.
Sulod sa 30 ka adlaw gikan sa pagka-epektibo sa EO, ang samang grupo sa mga ahensya gitahasan usab sa paghimo ug pag-isyu sa mga giya nga gikinahanglan, o pag-amendar o pagkonsolida sa kasamtangang mga lagda, regulasyon, o mga isyu nga angay alang sa epektibong pagpatuman sa mando. (Elvira Bongosia /PIA7-Bohol)
