DINHI sa Dakbayan sa Tagbilaran, didto gayud sa kaniadto Dumadag Farm sa Taloto, ika-19 sa Nobyembre, tuig 2000, nanumpa ang dili moabut og napulog-lima ka mga Bol-anong manunulat atubangan kang UP Tacloban Professor Merlie Alunan, og miingon:
“Ako, (ngalan), isip sumusunod ni Karyapa, nanumpa nga akong palambuon ang mga mithi sa panulat ug pag-asoy alang sa kabulahanan sa katilingbang Bol-anon, ingon man sa tibuok nasud nga Pilipinhon”.
Si Karyapa mao ang unang Pilipinhon (babaye) nga nahisulat sa kasaysayan sa Pilipinas nga maoý unang nahipatik nga magbabalak (mananambal usab o meriko). Usa siya ka Bol-anon. Garbo nato sa Bohol. Segun sa mga sugilanon mahitungod sa atong nasudnong bayani nga si Dr. Jose P. Rizal, iyang hikaplagan ang ngalan ni Karyapa sa libro nga nag-ulohan, Sucesos de las Islas Filipinas, nga sinuwat sa Katsila nga si Antonio de Morga.
Angay pamalandongan sa mga kalalakin-an nga bisan niadtong wala pa moabut ang mga Katsila dinhi sa ato, ang kababayen-an mao na ang mga lideres sa atong katilingban. Ang kababayen-an gisaligan sa tanang natad sa kalihukan. Sila ang mananambal, manunulat, mang-aawit, mag-uuma, tigmugna sa nagkalain-laing produkto, ug nangulo bisan sa panggubatan sama kang Gabriela Silang.
Busa, atong gi-agni ang Bol-anong kababayen-an, ilabi na kadtong adunay kahanas sa pagsulti ug pagsulat. Batuni ninyo ang kaisug ug barugi ang kaliwatan ni Karyapa. Ipadayon ang pagsulat ug pagpakigbisug alang sa hustong mga katuyuan, kagawasan sa kultura ug pagtuo, kaangayan sa tawhanong katungod ug pamulitika, ug pag-inigsoonay sa natad sa patigayon ug panalapi.
Ang Kaliwat ni Karyapa, kahugpungan sa mga aktibong Bol-anong manunulat (babaye ug lalaki) nga nagpakabana sa natad sa kultura, arte ug kapanulundanan dinhi sa minahal tang lalawigan sa Bohol sukad pa niadtong tuig 1997. Ato nang gipasiugdahan ang daghang pagbansay-bansay sa pagsulat og balak ug sugilanon. Nakamantala na usab kita sa pipila ka mga basahon ug pasundayag sa publiko. Ang Kaliwat ni Karyapa naglakip sa mga miyembrong bag-o pang gisubhan, may miyembro usab nga nakadawat na sa inilang Palanca Award sa literary arts, mga magtutudlo, ug mga batan-ong manunulat sa Binol-anon ug Cebuano, English ug Filipino.
Kung buot kamong mosalmut ipadala ang inyong tulo (3) ka orihinal nga sinuwat nga balak, lawence03@gmail.com ug usa (1) ka hamubong sugilanon o salaysay sa karyapa@gmail.com.
