BISAN pa kon ang Comelec magsige og yawyaw nga guinadili gayud ang “vote-buying” panahon sa Piniliay, dili gihapon kini mosaril.
Ngano man? Dili maarang sa prisuhan kon ilang pangdakpon ang katawhang mobotar ug ang mga magpapili.
Sa matag usa ka gatos nga kandidato, maayo lang kon anaay usa nga dili gayud mogamit og salapi aron modaug. Ug maihap ra sa tudlo ang mobotar nga dili kinahanglan tunulan og sobre.
Ang tanang gustong modaug, mogamit gayud og kuwarta — kay mao na kini ang gipangayo sa kahigayunan. Kuwarta. Kuwarta. Kuwarta.
Daghang nangandoy nga makaalagad sa katawhan apan mapakyas kay walay ikapalit og boto. Ang mga walay kapasidad nga mahimong lider, modaug. Kasagaran.
Mao kini ang rason nganong kon anaay mga kalamidad, magkagubot ang katawhan ilabina kon hinabang ang hisgutan ilabina ang salapi — kay kuwang sa kahibawo kon unsaon pagdumala.
Ang ubang mga kagawad, kon dili man ang mayorya, dili kamao mohimo og balaod nga maoy ilang numero-unong trabaho.
Kay kon makamata lang ang katawhan sa reyalidad, hayahay ang katilingban. Ang pangutana, kanus-a pa?
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
