UNSA ang nasud nga giilang labing malipayon sa tibuok kalibutan segun sa mga scientific studies? Kana mao ang Denmark. Nganong migawas man nga labing malipayon ang katawhan sa Denmark? Tungod kay libre ang edukasyon, libre ang healthcare, ug uban pa. Walay ginikanan nga maguol og asa’g ibayad sa tuition fees sa mga anak. Walay molinya sa istasyon sa radyo aron magpalimus og ibayad sa ospital.
Ambut og ikapila ang Philippines. Basta ang usa ka yano’ng nasud nga dili moderno, ika-walo. Kana mao ang Bhutan. Ang pagsukod nila sa kalambuan didto sa Bhutan dili pinaagi sa ekonomiya sama dinhi sa ato nga atong gisukod pinaagi sa GNP – Gross National Product o ang gidaghanon sa mga produkto sa atong ekonomiya maoy gihimong sukdanan sa atong gobyerno. Busa, bisag daghan kaayong kabus, daghang corruption sa gobyerno, kung daghang produkto nga gigama sa mga korporasyon, daku gihapon ang GNP ug sige gihapog pasiatab ang mga lideres nga kunohay lig-on ang ekonomiya. Apan didto sa Bhutan, ang ilang sukdanan sa kalambuan, GNH o Gross National Happiness. Sa ato pa, alang sa taga-Bhutan, kon dili malipayon ang katawhan, walay kalambuan.
Ang idolo sa kadaghanan nga United States of America dili mao ang happiest. Unsaon gud intawn pagkamalipayon sa nasud kon ang kaigsoonang negro pasipad-an lang tungod sa ilang pagka-itum og pamanit? Sa laing bahin, ang mga nasud nga giilang idolo ni kanhi Presidente Duterte nga mao ang mga komunistang nasud sa China ug Russia, lakip ba sa mga malipayon? Dili gayud.
Unsaon gud intawn pagka-malipayon sa China nga lisud man kaayo i-simba didto. Nakaadto ta sa tuig 2001 isip production assistant ug emcee sa concert sa Loboc Children’s Choir didto sa Hongkong ug Tianjin. Usa ka Domingo niana, gusto untang mosimba ang mga bata ug ilang mga kaubang ginikanan. Perteng lisura namo pagpangita sa Simbahang Katolito kay gitaguan kini tungod kay atheist ang ilang gobyerno, walay gituhoang Dios.
Ang Presidente usab sa Russia nga si Vladimir Putin kanhi pangulo sa KGB nga mao ang ilang opisyal nga tigpaniid sa ilang mga kontra o bisan sa ilang kaugalingong katawhan. Daghan na sa iyang mga kaatbang sa politika ang mikalit lang og kahanaw ug makit-an na lang sa daplin sa kadalanan nga nagbuy-od. Makalilisang. Ang labing makalilisang mao kini: Si Donald Trump ug si Vladimir Putin amigo kaayo ug posibleng managkonsabo. Adunay mga ekspertong tinubdan nga nagsulti nga si Trump kuno usa ka asset ni Putin kay gitabangan niya kini pagdaug sa eleksyon pinaagi sa pagdaut kang Hillary Clinton ginamit ang kahimanan sa Facebook.
Apan kita hugot nga nagtuo sa giingon sa Bibliya nga: “The Lord will frustrate the plans of the wicked”. Pakyason sa Dios ang laraw sa mga dautan. Atong iampo ang kalinaw sa kalibutan, ilabi na kadtong mga nasud diin daghang mga OFW. Di lang ta moapil sa ilang kagubot. Matud pa ni Pope Francis, daghang mga Filipino workers ang nagdala sa ilang halawom nga pagtuo ngadto sa mga banay sa laing nasud. Ig-ampo ta sila.
