DUHA ka mga barangay kapitan ang midagan nga walay kontra sa dakbayan sa Tagbilaran alang sa piniliay sa barangay karong Oktubre 30, 2023.
Sila si June Ramon Duroy alang sa Poblacion II ug Joseph Sagaral alang sa San Isidro parehong walay kontra samtang unom gikan sa 15 ka barangay tagtulo ang mag-away alang sa barangay kapitan.
Gipaabot ang mainiton ang botohan sa 6 ka barangay nga adunay three-cornered race nga mao ang Bool uban ni Joseph San Jose, Rail Bugash ug Jose Ringca; Booy uban ni Ruperto Jeverola, Eutorgio Telmo, Jr ug David Rey Tirol; Manga kauban sila Arnolfo Sagaral, Nilo Lumantas ug Deogfracias Dalida; Mansasa uban nila Bernadette Blanco, Arvin Visarra ug Arthur Cagadas; Poblacion III uban nila ni Maureen Glovasa, Felixberto Remolador ug Felix Castano; Tiptip kauban sila Leonida Lumantas, Jeminador Landape ug Antonio Sulague.
Ang mga barangay nga adunay one-on-one nga lumba alang sa mga barangay kapitan mao ang: Cabawan tali ni Sergio Bangalao ug Apolonio Onyot; Cogon tali ni Geneson Balbin ug Gian Carlo Besas; Dampas tali ni Marlou Anana ug Bernardito Alturas; Dao tali ni Alberto Puagang ug Noel Anore; Poblacion I tali ni Ma. Luz Quiobe ug Ramil Patino; Taloto tali ni Francis Eugene Zamora ug Jay Penaflor ug Ubujan tali nilang Mary Jane Ruiz ug Junlee Barimbao.
Subay niini sa umaabot nga eleksiyon sa barangay sa dakbayan gilantaw nga political gihapon bisan pa sa gipahayag sa COMELEC nga ang eleksyon, sama sa SK, kinahanglang non-partisan.
Ang mga tigpaniid sa politika nitug-an nga ang Poblacion III ug Manga gideklarar ni Mayor Jane Yap nga free zones samtang ang laing 13 ka mga barangay adunay lig-on nga kontra.
Samtang, bisan pa sa pagpakahilom ni Konsehal Atoy Torralba, namatikdan sa mga tigpaniid ang 10 ka mga kandidato nga pabor kaniya.
Sila mao si Bugash sa Bool, Telmo sa Booy, Onyot sa Cabawan, Alturas sa Dampas, Anore sa Dao, Visarra sa Mansasa, Patino sa Poblacion I, Penaflor sa Taloto, Sulague sa Tiptip ug Barimbao sa Ubujan. (RTB)
