TAGBILARAN CITY, Bohol, Sept 6 (PIA) –Upat ka Bol-anon nga magtutudlo sa mga pangpubliko nga tunghaan sa elementary ug high school ang napasidunggan tungod sa mga inisyatiba sa pagtudlo nga nakit-an nga sobra na sa gipangayo sa kagamhanan.
Didto sa kick-off sa National Teachers’ Month sa Visayas nga dinhi himoa sa Bohol, Septembre 5, gipasidunggan ug gisaksihan ang ilang ehemplo sa kapin sa 2,000 ka mga magtutodlo ug mga tigdumala sa mga pangpubliko nga tunghaan.
Gipasidunggan sila Master Teacher II Agustina Doloritos sa Totolan Dauis Elementary School, Master teacher 1 Guadalupe Boiser sa Loon South Central Elementary School, Secondary School Teacher III Luciano Bargaso sa Japer ug si Master Teacher 1 Pablita Cabarles sa Manga National High School, Tagbilaran City.
Daghan nga Badjao ang nangukswela na sa Totolan, apan daku kaayo nga suliran ang pagtudlo sa mga Badjao sa pinulungan nga masabtan sa tanan.
Naghupot sa 53 ka Grade 1 learners, nakita niya ang daku nga gap kay dahu ang hagit sa language barrier, apan sa pagpakighigala sa ginikanan sa mga Badjao ug paglista sa mga pulong nga Badjao aron masabtan sila sa klase.
Sa paggawas sa mother tongue, nagamit niya ang iyang nahibaw-an nga bag-ong pinulongan sa contextualized ug indigenized learning materials subay sa indigenous peoples education, nga maoy hinungdan nga mingmaayo ang reception sa mga bata nga Badjao.
Sa laing bahin, si MT1 Guadalupe Boiser, usa ka Special Education Itinerant nga magtutudlo sa Loon South Central Elementary School, kinsa mosugid nga gidamgo siya og mga dots, nga sa kaulahian, iyang habibaw-an nga Braille Dots diay, nga maoy alpabeto sa mga nahikawan sa panan-aw.
Sanglit SPED teacher, bisitahon ni Boiser and iyang mga estudyante, bisan pa on gawas na sa iyang District, aron lamang magiyahan ug makuha niya ang tag 3-4 ka estudyante matag semana nga matutokan sa pagbasa sa Braille.
Gawas sa visually impaired, aduna usab siyay mga estudyante nga lahi-lahi ang disability, nga nagpahimong mas lisud nga hagit sa pagtudlo.
Apan sa way paglubad nga serbisyo, may mga estudyante na siya nga mogradwar na sa kolehiyo, mga tawo nga kanhi nagtuo nga wala na silay pagpaum nga makasinati sa maayong kaugmaon.
Si Secondary School Teacher Luciano Bargaso, taga Triple Union ug nagtudlo sa Japer Memorial School sa Sagbayan, usa ka Robotics coach sa lima na ka tuig.
Nahisakop sa DepED Bohol Roboholics team, bisan pa sa mga kalisud sa katalagman, kawalay koryente ug didto sa First LegoLeague Philippines, ilang gisuwayan bisan sa kalisud ang pagpadayon sa bangga ug nakakuha sa ikaduhang lugar overall sa national competition ug ang Best Project Innovation nga nakapadala nila ngadto sa gawas sa nasud didto sa Southern California.
Nakuha usab nila ang First place sa First Philippine Robotics Olympiad didto sa Olongapo City, nga mao usab ang ilang ticket ngadto sa pagrepresentar sa nasud ngadto sa World Robot Olympiad didto sa Panama.
Si MT1 Pablita Cabarles mingdaug na sa 2023 Civil Service Commission Pag-asa Awardee for Outstanding Government Service, may 27 na ka tuig nga nagtudlo sa agricultural, sa kasagaran senior high school isip Gulayan sa Paaralan Program Implementor.
Nahisakop na niya ang TLE ug TVL ubos sa iyang department, napun-an pa ang iyang trabaho sa pagpananum, pagbaboyan, manokan ug kanding ug tulo ka fishponds, apan kay mahal niya ang trabaho, nahimo na niya uban sa mga estudyante ang pag-urban gardening.
Bisan sa syudad, gitanyag pa gihapon nila sa iyang tunghaan ang kamahinungdanon sa agrikultura ug pagproduce sa pagkaon pinaagi usab sa pagmotivate sa mga kabataan, kay nagkatiguwang na ang mga mag-uuma ug wala nay mosunod sa pagsupply sa pagkaon.
Dedikasyon, pagkugi ug pagmahal sa trabaho, kini maoy komon nga kinaiya sa mga magtutudlo nga bisan sa ilang kaugalingon nga mga pamaagi, nakapabilin og lama nga lisud hingkalimtan sa ilang mga tinun-an. (PIA-7/Bohol)
MODELO SA DEDIKASYON. Sila teachers Agustina Doloritos, Luciano Bargaso, Guadalupe Boiser ug Pablita Cabarles mipaambit sa ilang mga kasinatian isip magtutudlo nga kahinaminan sa mga Bol-anong educators, atul sa kick off ceremony sa National Teachers Month 2023, didto sa Bohol Wisdom School, Sept 5. (PIABohol)
