TAGBILARAN CITY, Bohol, Sept 5 (PIA) –Duha ka karaan nga gambalay sa Valencia Bohol ang gideklara na sa nasud nga lakip sa mga Importante nga Kulturanhong Kabtangan (Important Cultural Property), ug gitbutangan na gayud sa National Museum sa iyang haum nga marker.
Dungan sa ika 152 nga tuig sa katukuran sa parokya o Parish Foundation Anniversary, gitukasan sa National Museum of the Philippines – Bohol kauban ni Bishop Alberto Uy sa Diyosesis sa Tagbilaran ug ni Rev Fr. Efren Dolauta ang timaan isip Importanteng Cultural Property ang simbahan sa Sto. Niño Parish Church sa Valensia ug ang iyang karaang kombento.
Kahinumduman nga Septembre 28 pa niadtong 2017 nahukman sa NMP nga hatagan sa importante nga marker ang simbahan apan pala kini matugyan tungod sa mga kakulian.
Niadtong Octubre 11, 2018, opisyal nga nga gipahibaw ang parokya nga ang simbahan nadeklara na isip importante nga kulturanhong kabtangan sa nasud, tungod kay kombinsido ang NMP sa iyang dili hingtupngan sa iyang sawog nga kahoy nga tabla, ilabi na kay kini gipakapinan pag sal-ut-sal-ut nga tugas nga puti ug bayong nga itum sa iyang desinyo.
Gawas sa desinyo nga murag bukog sa isda, may dako nga mosaic sa gitabla nga kahoy nga naa sa atubangan sa altar ug may sarangan nga makit-an sa kilid-kilid sa mga sawog nga table, aron may bentilasyon usab sa ilawom sa sawog.
Matud pa sa NMP, ang kuti nga desinyo sa sawog mas labi pang napakita sa tungatunga nga bahin sa duha ka pakopako sa simbahan diin makit-an ang higante nga desinyo sa buwak nga may talinis og gihay, nga mas tataw nga Makita kon magdungaw ka sa simborio sa simbahan.
Tungod niini, ang simbahan nagpakita sa talagsaon ug makapahingangha nga kabilin nga nagtimaan sa kakugi ug pagtamud sa mga kanhi nagpa-tulo sa singot aron matukod ang simbahan nga minglungtad pa hangtud karon.
Didto sa makasaysayanong kasaulogan uban usab sa misa nga gipangunahan ni Obispo Uy, parish priest Rev. Fr. Efren D. Dolauta, mga opisyales sa lungsod pinangulohan ni Mayor Dionisio Neil A. Balite.
Didto usab aron magrepresentar sa lalawigan sa Bohol si Vice-Governor Dionisio Victor A. Balite, kinsa lumad nga taga Valencia. (PIA-7/Bohol)
