TUNGOD sa nagkamahal nga presyo sa bugas sa kamerkaduhan, ang gobyerno nihimo og “solusyon” aron maminus-minusan ang gibug-aton sa mga konsumidor niini.
Gi-isyo ni Presidente Bongbong Marcos Jr. ang Executive Order No. 39 nga nagtakda sa price ceiling sa bugas.
Ang maong mandato ni-epekto sugod kaniadtong Martes, Septiyembre 5.
Ilawom sa maong mando, ang regular-milled rice ipabaligya sa tag P41 matag kilo samtang ang well-milled rice tag P45/kilo.
Apan daghang yangungo gikan sa mga mamaligyaay og bugas sa maong mandato.
Lisod ang pagpatuman nila nga himuong P41 ug P45 ang kilo sa bugas ilabina kon karaan kini nga stocks.
Sa EO 39, gimanduan ni PBBM ang kapulisan nga dakpon ang mga negosyante mga dili mosunod sa gitakda nga presyo sa bugas.
Sa social media, daghang netizens nga gipaagi na lang sa katawa ang solusyon ni PBBM.
Layo ra kuno sa P20/kilo nga bugas nga gisaad sa Presidente. Ug ang bugas nga ibaligya og P41 o P45, nanglagom na kay karaang stocks ug angayang ipakaon sa manok.
“Wala na ba’y laing solusyon ang gobyerno sa mahal nga presyo sa bugas,” pangutana sa mga Pinoy.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
