USA ka konsehal nihagit sa kaubang kagawad sa lungsod sa Mabini, Bohol tungod sa lantugi sa ilang sesyon.
Matud ni Kag. Jerson Mendoza Curit, 35, sa police blotter, nga si Kagawad Levito Amor Baldo, taga-barangay San Isidro mihagit kaniya sa sinumbagay samtang sila naa sa ilang sesyon.
Ang paghagit ni Baldo nahimo tungod kay mosupak kini sa mga pahayag ni Curit.
“Adto tas gawas sumbagay aron maila nang imohang kaisog, dika bulagta jud ka,” matud ni Baldo sa hagit niya ni Curit.
Si Curit mitubag nga, “basen gatoo kag atrasan ka nako.”
Matud ni Curit nga nagsige’s hagit kaniya si Baldo.
Ug sa dihang mogawas na sila sa sesyon hall, si Baldo miagni na sab kang Curit sa sumbagay, apan, ning higayona siya (Curit) mitubag, “Di ko mosukol nimo kay naa pakoy mga pangandoy.”
Sa pakighinabi kaniya, si Curit nagkanayon nga ang hagit kaniya ni Baldo usa ka hulga sa iyang kinabuhi mao nga iya kining gipa-blotter.
Ang blotter pinirmahan ni PLPT Joy Escaran Dawa, hepe sa kapolisan sa Mabini ug ni PCPL Jomar Torres, isip recorder ug ni NUP Roselyn Fullido, isip nag-andam sa blotter. (rvo)
