ANA-A sa katawhan ang problema kon ang lider ug ang lungsod walay maayong pagdumala.
Tinuod nga ang korapsyon nakaugat na sa sistema sa pamolitika ug pang-gobyerno sa Pilipinas, apan kon anaay pagpakabana ang katawhan, wala kini lugar sa bisan asang opisina de gobyerno.
Ang kasaysayan nagsulti nga ang katawhan dugay makaamgo. Kinahanglan pa nga moabot sa punto nga mag-abusar og ayo ang ana-a sa pamunoan aron molihok.
Numero-uno nga hinungdan mao ang pagka-talawan o mahadlok mosukol sa mga abusadong lider.
Dinhi sa Bohol, anaay mga pinili nga gigamit ang gahum aron makontrolar nila ang katawhan. Ug kon kinsa kadtong hanas sa balaod, maoy kusog maglisod-lisod sa katawhan.
Kon anaay mangulo alang sa kabag-uhan, makaamgo sa unanay ang katawhan. Ang nakaapan lang kay dili dayon magpakita nga mosukol kon pipila lang ang gusto og kausaban — kinahanglan daghan ang mobarug.
Kon ikaw usa sa dinaug-daug nga panon sa katawhan, agniha ang uban nga suklan ang abusado, hiwi o kurakot nga mga politiko.
Dili sayon ang krusada alang sa limpyong pang-gobyerno, nagkinahanglan kini og pagsakripisyo aron magmalampuson.
Wala kita’y laing gusto kon dili ang makabaton og tarong nga liderato.
Kon maghugop lang ang katawhan, dayag nga mo-abante ang lungsod ug ang katilingban. Makigbisog alang sa sakto ug makatarunganon!
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
