GIPANGUNAYAN sa pagduso ni Duero Mayor Al C. Taculad sa mga rekisitos ug papeles nga gikinahanglan arun mahatagan og katumanan ang P20M Duero Port project sa lungsod.
Kini base sa iyang mga suwat nga gipadala ngadto kang DENR-7 Dir. Engr. Paquito Melicor Jr. pinaagi ni Mines and Geosciences Bureau-7 Dir. Armando Malicse.
Arun ma-release ang Special Allottment Release Order (SARO), gikinahanglan ang Geo-Hazard Certification. Iyang giawhag usab ang MGB-7 sa pagpahigayon og ocular inspection alang sa maong katuyuan.
Ang Environmental Certification gikinahanglan usab luwatan sa EMB-7 pinaagi ni Dir. Maribel B. Munsayac.
Kon masugdan na ang maong proyekto, dugang kalamboan kini sa Duero nga naila isip “sleeping municipality before, now no more.”
Kasamtangang nagpadayon ang katukuran sa bag-ong Legislative Building atubangan sa Balay Lungsod samtang gihan-ay na ang mga rekisitos alang sa “soft opening” sa Duero Food Park nga himoon karong buwana. (Kahlil Lester O. Camba)
