MIPAGAWAS og memorandum ang Department of Interior and Local Government (DILG) aron sa pagpangtangtang sa mga malapasong election propaganda materials nunot sa umaabot nga 2023 synchronized Barangay ug Sangguniang Kabataan elections.
“Section 252 of COMELEC Resolution No. 10924 mandates that any prohibited form of election propaganda shall be stopped, confiscated, removed, destroyed down by COMELEC representatives, at the expense of the candidate for whose apparent benefit the prohibited election propaganda materials have been produced, displayed, and disseminated,” parte sa DILG memo.
Ang Commission on Elections (COMELEC) mi- deputized sa Local Government Units, DILG ug uban mga ahensiya sa gobiyerno sa pagtabang pagpanangtang aning mga gidili nga election propaganda materials.
Ang mga mayor gimandoan sa nga suportahan ang Comelec pinaagi sa pagpagamit sa ilang mga ekipo sa paghimo niini.
Bisan ang mga barangay kapitan, gimandoan pagtudlo og mga barangay tanods nga motabang sa operasyon sa Comelec sa pagpanangtang niini pinaagi sa superbisyon sa Election Officers ug ipahibalo sa ilang buhatan ang resulta.
POSTERS PANGLAKATON
DILI gusto ni Tagbilaran City Mayor Jane Yap nga himuong “poster city” ang siyudad tungod niining daghang mga posters sa mga nagkadaiyang kalihokan, produkto, serbisyo sa mga nagkalain-laing kompanya diha sa kadalanan.
Ang City Solid Waste Management Office (CSMWO) gimandoan ni Yap sa pagpanangtang sa mga tarpaulin o posters nga gipamilit diha sa mga poste ug ubang mga dapit sa siyudad.
Tumong niini nga mamentinar ang kalimpyo ug kahapsay sa dakbayan ug gipahimagnoan sa kagamhanan ang mga commercial establishments nga dili himoon ang dakbayan nga usa ka “Poster City.”
Kahinumdoman gipahibawo ni Yap nga buot niyang himuong “Singapore-like” ang dakbayan hinungdan nga daghang mga kausaban nga gihimo ang siyudad, kasagaran pagpanindot sa palibot sa lugar.
Matud pa usab sa mayor kinahanglan niya ang kooperasyon sa katawhan aron mamentinar ang kalimpyo sa dakbayan. (RTB)
