Ni: Wilson Auguis Subrio
WALAY barangay nga pasagdan ang kasamtangang administrasyon ni Gobernador Aris Aumentado, busa, gihatdan niini ang mga barangay sa lungsod sa Trinidad, Bien Unido ug San Miguel nga nikabat og P346,000.00. nga kinatibuk-ang hinabang-pinansyal gikan sa Kagamhanang Probinsyal sa Bohol.
“Gihatod didto sa duha ka mga barangay sa Trinidad ang mga pinansyal nga ayuda gikan sa Kagamhanang Probinsyal nga nagkantidad og P190,000 nga gamiton sa ilang mga panginahanglanon sa komunidad,” matud ni Gob. Aris sa social media.
Si Executive Assistant Jun Flores maoy nitunol sa maong hinabang-pinansyal ug nipaabot sa mensahe ni Gob. Aris sa pagsuporta ngadto sa ilang paglambo.
Ani-a ang duha ka barangay nga na-grasyahan:
Barangay Mahagbu, Trinidad – P150,000 alang sa rehabilitasyon sa Purok 6 Center. Gikan kini sa mga buhatan nila ni Bokal Tomas Abapo, Jiselle Rae Aumentado-Villamor ug Vierna Mae Maglasang.
Barangay Tagum Norte, Trinidad – P40,000 alang sa pagpalit og siyam (9) ka mga school printers sa Tagum Norte Elementary School. Gikan kini sa buhatan ni Bokal Abapo.
P106,000.00 nga ayudang-pinansyal ang gihatud usab sa duha ka barangay sa lungsod sa Bien Unido.
Ani-a ang mga benipisyaryong barangay:
Barangay Tuboran, Bien Unido – P57,000 alang sa gipahigayong socio-cultural activities sa ika-54 nga Foundation Day niadtong Abril 24, 2023. Gikan kini sa mga buhatan nila ni Bise Gobernador Dionisio Victor Balite, Bokal Tomas Abapo, Jiselle Rae Aumentado-Villamor, ug Gloria Gementiza (PCL).
Barangay Nueva Esperanza, Bien Unido – P49,000 alang sa Road Re-gravelling and Rehabilitation sa Purok 4 ug 5 sa maong barangay. Gikan kini sa buhatan ni Bokal Villamor.
Samtang P50,000.00 ang gi-deliber sa Brgy. Caluasan, lungsod sa San Miguel.
Ang maong pinansyal nga ayuda alang sa improvement of farm to market road. Gikan kini sa paningkamot ni kanhi Bise-Gobernador Rene Relampagos.
“Hangyo nako sa mga barangay officials nga i-liquidate dayon kini kay naghuwat ang P200,000 nga tabang alang sa inyong priority project. Daghang salamat!,” matud sa amahan sa probinsya.
