NIPAGAWAS na og Certificates of Candidacy (COC) forms alang niadtong gustong modagan sa Oktubre 30 nga Barangay and Sangguniang Kabataan Elections (BSKE) tulo ka semana sa dili pa magsugod ang filing period ang Commission on Elections (Comelec)
Sa opisyal nga website niini, ang Comelec nagkanayon nga ang COC forms mahimo nang ma-download online sa aspiring candidates sa dili pa ang COC filing period.
“This page contains downloadable forms in relation to the filing of certificates of candidacy in connection with the 2023 Barangay and Sangguniang Kabataan Elections,” sumala sa Comelec.
Ang mga porma naglakip alang sa punong barangay, Sangguniang Barangay member, Sangguniang Kabataan chairperson ug Sangguniang Kabataan member.
Ang komisyon nag-ingon nga ang mga porma sa COC kinahanglang maimprinta sa duha ka kilid (atubangan ug likod) sa folio (8.5”x13”) o legal (8.5”x14”) nga gidak-on sa kopya nga papel.
Ubos sa Comelec Resolution No. 10924, ang mga kandidato sa BSKE kinahanglang motuman sa gipanumpaang mga COC sa porma nga gilatid sa komisyon alang sa posisyon nga ilang gitinguha.
Ang COC filing period magsugod sa Agusto 28 hangtod Septiyembre 2, gikan sa alas 8:00 sa buntag hangtod sa alas 5:00 sa hapon.
Ang Comelec niingon nga ang mga COC kinahanglang i-file sa tulo ka mabasa o klaro nga kopya sa Office of the City / Municipal Election Officer nga dunay hurisdiksyon sa ilang mga barangay. (RTB)
