GIPAHIBALO sa Department of Education nga magsugod ang klase sa tanang pangpublikong eskuylahan sa nasud karong Agosto 29,2023.
Samtang mga private schools mahimong magsugod sa ilang klase bisan unsang petsaha sa bulan sa Agosto dugang pa sa advisory sa DepEd nga gipagawas karong bag-o.
Niadtong nakalabay nga tuig, gibuksan sa DepEd ang klase sa kataposang bahin sab ning bulana sa Agosto.
Dunay kapin 28 milyones ka mga tinun-an sa public schools para sa school year 2022 hangtud 2023 ang natala sa maong departamento.
Dili palang dugay, gipahibalo sa DepEd nga ilang gitun-an ang mga sugyot nga ibalik sa karaang academic calendar ang mga klase, kini magsugod sa bulan sa Hunyo ug matapos sa summer breaks gikan sa Abril hangtud sa Mayo.
Ang rason sa tinguhang pagbalik sa karaang school calendar mao ang grabeng nasinating kainit sa mga lawak saringan sa mga bulan sa Marso, Abril hangtud Mayo ug daghang mga tinun-an ang napugos sa pag-absent tungod niini kay ang uban nangasakit.
Sa survey nga gihimo sa 11 mil ka mga magtutudlo sa pangpublikong tunghaan giingong 67% kanila ang nakasinati og dili maagwanta nga kainit sa sud sa ilang mga lawak saringan, dili sab makatutok sa klase ang mga bata tungod niini mao nga ang uban dili mosulod sa klase.
Ang Teacher’s Dignity Coalition ug Alliance of Concerned Teachers maoy nanawagan nga ibalik kini sa karaang school calendar.
Aron makabawi ang mga bata, ang DepEd milusad sa nakalabay nga buwan sa labing una niining learning recovery program nga ang target mao ang Grade 7 ug Grade 8 nga naglisod sa subjects nga English, Science ug Mathematics.
Dili hinuon kini pugsanay sa mga tinun-an o sa magtutudlo, ang tumong lang niini nga matabangan ang mga nabiyaang mga bata. (RTB)
