SIGUROHON sa kagamhanang probinsyal nga gipangulohan ni Gob. Aris Aumentado nga dili magkalisod ang mga investors o magmahay sa ilang pagbutang sa patigayon sa Bohol.
Kini gumikan kay sektor sa enerhiya dili niya pasagdan nga usa usab sa Development Agenda sa dihang nangalagad isip gobernador.
Kon mahuman na ang maong proyekto, gilaomang mas modagsa pa ang mga investor sa Bohol.
“On-going” ang katukuran sa 25-MW Dagohoy Solar Power Project didto sa San Vicente, Dagohoy.
Dili usab mohunong ang mga namunuan sanglit abli usab sila sa mga potensyal investor alang sa wind power ug waste-to-energy facility.
“Ang Bohol isip agricultural province nagkinahanglan sa mga pasilidad pang-irigasyon. Subay niini, ang National Irrigation Administration (NIA) niimplementar sa multiple irrigation projects sa lalawigan”, pamahayag pa ni Gob. Aumentado.
64% na ang “irrigable land area” sa Bohol nga naserbisyohan niini. Ang Bohol NorthEast Catch Basin naglakip sa Bien Unido, Trinidad, San Miguel ug Ubay.
Ang mga pantalan sa lalawigan maoy usa sa mga nahimong hinungdan sa kalamboan. 7 ka Port Improvement projects ang na-kompleto sa niageng tuig samtang karong tuiga 10 ka Port project ang kompletohon .
Gi-endorso na usab sa Provincial Development Council ang proposed Maribojoc Port Zone Delineation.
Pipila ka mga kalsada paingon sa mga Seaport, Airport ug mga tourist destination pinaagi sa DTI-DPWH-DOT Convergence kon diin 61 kilometros na ang nakompleto kantidad P1.13B.
Padayon ang katukuran sa usa sa prayoridad sa kagamhanang probinsyal nga mao ang Talibon-Bien Unido Bridge nga magkonektar sa Nueva Esperanza, Bien Unido ngadto sa San Isidro, Talibon.
Kon mahuman na kini, ang kanhiay 30 minutos nga travel time mahimo na lamang 19 minutos.
Dugang pa niini ang Aumentado administration mag-umol sa Local Public Transport Route Plan uban ang 48 component LGUs. Dunay mga survey na nga gipanghimo alang sa existing Public Transport Network assessment.
Ang tumong niini arun mas daghang transport operators ang makakuha og prangkisa.
Giduso na usab pinaagi sa PDC Resolution ang usa ka Feasibility Study sa DPWH alang sa ikaduhang Circumferential Highway. (Kahlil Lester O. Camba)
