GIPAHIGAYON na ang groundbreaking sa 250-room Mo’ayon Hotel sa Panglao nga igsuong kompanya sa Moadto Mall ug Modala Beach Resort niadtong Hulyo 19.
Usa kini ka dugang kaugmaran sa Tumoy Leisure Village nga gipangunahan ni Engr. Manny Mendoza, kinsa nanag-iya sa Monocrete Construction Philippines Incorporated.
Ang disenyo niini subay sa kang Archt. Jose Pedro C. Recio.
Ang groundbreaking ceremony gitambongan usab sa mga kadagkuan sa lalawigan sa Bohol sama nila Gob. Aris Aumentado, 1st district Cong. Edgar Chatto, SP Chairperson on Tourism Board Member Tita V. Baja ug uban pang mga bisita.
Namahayag si Gob. Aumentado nga ang Mo’ayon Hotel usa lamang sa mga buhing ebidensya sa “booming tourism” sa Bohol.
Ang hinlo nga panggobyerno niresulta sa pagdasuk sa mga investors dinhi sa lalawigan ilabi na sa Panglao.
Ang mga sakop sa media nahatagan usab sa higayong makasaksi sa padayong katukoran sa Tumoy Leisure Villas nga gilaomang mahuman karong Setyembre 2023. (Kahlil Lester O. Camba)
