TUIG pa kapin (1 ka tuig ug 10 ka bulan) sa dili pa ang Piniliay sa 2025, apan anaay nagsugod na og pamolitika.
Anaay pipila ka mga politiko dinhi sa lalawigan nga nagsugod na og “paramdam” alang sa umaabot bugnong lugaynon.
Ang uban nagsige na og suroy-suroy sa mga kalungsuran pinaagi sa pag-sponsor og mga sporting events, ubang klase sa entertainments ug daghan pa.
Ang mga tigpaniid sa politika sayon rang makasabot sa mga lihok sa maong mga politiko.
Ang mga die-hard nga dumadapig o fanatics, dili makakita niini. Kon makakita man gani, pipila lang kanila.
Ana-a usab ang istorya nga anaay pipila ka mga politiko nga niubos ang “ratings” ug giingong nabalaka niini.
Gitumbok nga dakong hinungdan niini mao ang mga exposé sa pipila ka mga giilang banggiitang kritiko ug anti-corruption crusaders.
Gihungihong nga ang mga naapektuhang pinili sa katawhan mokiha sa mga tawo nga hinungdan sa pag-us-os sa ilang ratings.
Ang uban usab nga giingong nadutlan sa mga birada, nigamit sa ilang posisyon aron hinay-hinayon og patak-om ang ilang mga tigsaway gamit ang ilang nahibaw-ang epektibong lakang.
Kon ikaw walay gihimong dautan sa imong pagpangalagad sa katawhan, dili makaapekto kanimo ang mga tinumo-tumo nga sala o isyu, gawas na lang kon tinuod gayud.
Kay kon magpaila ka nga apektado, mas masabtan sa katawhan nga basin anaay kamatuoran ang mga akusasyon batok kanimo.
Usa ra gayud ang buhaton sa mga lider sa gobyerno aron dili madaot ang imahe: buhaton ang trabaho subay sa mandato sa balaod o Konstitusyon. Buot pasabot, pagtarong sa inyong pagpanerbisyo!
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
