GIPADAYAG sa kanhi komisyoner sa National Youth Commission (NYC) ug kanhi administrador sa Cooperative Dev’t. Authority (CDA) Benjie ‘Bobong’ Sanchez-Oliva ang iyang suporta sa House Bill No. 3841 ni Representative Michael Morden nga giduso ngadto sa Kongreso.
Ang maong HB nagtinguha kini nga mas palapdan pa ang mga benepisyo ug insintibo sa mga barangay tanod sa tibook nasud..
Nagkanayon si Oliva nga ang maong tinguha alang sa mga benepisyo sa mga tanod usa ka pamaagi sa pag-ila sa ilang mahinungdanong papel sa pagtuman sa serbisyo sa gobiyerno ngadto sa mga komunidad.
Ang mga tanod kinsa boluntaryo nga nihatag sa ilang serbisyo maoy unang moresponde kong adunay mga krimen o hulga sa siguridad diha sa mga barangay, sigon pa ni Oliva.
Pasabot niini nga ang serbisyo sa mga tanod sa pagmentinar sa kahapsay ug kalinaw sa ilang mga lugar kasagaran mataligam-an kini.
Nasayran ni Oliva nga ubos sa maong HB, ang mga tanod kinsa nakahatag og serbisyo sulod sa usa ka tuig sa bisan asang barangay adunay katungod sa mga kaayohan sulod sa panahon sa ilang katungdanan.
Dugang pasabot ni Oliva nga ang maong balaodnon nagtinguha nga madugangan ang mga benepisyo nga madawat sa mga barangay tanod sama sa hazard pay nga P1,000 kada buwan ug Christmas bonus nga ang kantidad katunga sa madawat sa kapitan.
Lakip niini ang insurance ug libre nga legal nga serbisyo gikan sa mga abogado sa gobiyerno nga modepensa sa tanod kong ugaling napasakaan kini og kaso kalabotan sa iyahang serbisyo. (RTB)
