ANG bansagong Aumentado naila sa politika sa Bohol isip de kalibreng lider ug gihatagan sa dakong pagsalig sa mga Bol-anon.
Karon nga si Aris maoy amahan sa lalawigang Bol-anon, ana-a kaniya nakasentro ang mga mata sa katawhan, iya man nga mga dumadapig o kritiko.
Nahibalik usab sa maayong imahe ang Bohol sa iyang paglingkod. Ug dayag kaayo ang mga kausaban nga iyang nahimo sulod lang sa usa ka tuig. Ug daghan pa’ng mga positibong kausaban ang posibleng moabot.
Gani, anaay pangagpas nga mahuman sa anak nga Aumentado ang tulo (3) ka termino. Dili kini imposible ilabina kay maayo kaayo ang gibilin nga legasiya sa iyang amahan ug siya mismo sa iyang pagserbisyo sa iyang distrito.
Daghan ang kumbinsido nga mahimo gayud kini sa kanhi 3-termer nga kongresista sa Segundo Distrito.
Dakong impak ang pagpasulod niya sa mga dagkong negosyante sa kaulohan. Iyang giablihan ang Bohol sa daghang opportunidad nga wala nahimo sa pipila ka niaging mga administrasyon, gawas sa iyang amahan.
Karon, bisan ang kadaghanan sa iyang mga kaatbang sa politika o dili mga supporters, nagpaduol na sa iyang kiliran. Gani ang mga giilang opposisyon nga mga politiko, nihural na sa iyang partido. Anaay gidawat ug anaay duha-duha pa nga pasudlon sa iyang grupo. Gitimbang-timbang pa.
Klaro ang intensyon ilabina kadtong mga mayor nga nitapo sa iyang nataran nga mangiyawat nga mahatagan og mga programa ug proyekto ang ilang lungsod.
Pasabot, politikanhong interes ra gihapon ang ilang giapas. Ug kana makita ilabina sa mga nagpaka-aron-ingnon nga niduyog na sa iyang administrasyon.
Anaay mga personalidad sa politika nga loyalista gayud sa mga nilabay nga administrasyon nga nag-uban-uban ug nag-ibid-ibid na niya ilabina sa mga importanteng kalihukan.
Ang kuyaw kadtong mga giilang anaay dili maayong “track record” sa ilang pagka-politiko.
Kinahanglan molaylo o molikay gayud si Aris sa maong mga politiko aron dili maduhigan ang iyang karera sa politika. Kay bisan pa pananglit nga iya ra kining gisakyan, mabutang sa bati nga imahe ang iyang liderato.
Ana-a usab ang mga giingong anaay hugaw nga rekord nga mga negosyante nisapidpid sa gobernador.
Ang tinuod, kinahanglan makita sa katawhan nga seryoso gayud ang gobernador ilabina sa krusada alang sa limpyong pang-gobyerno, ug magsugod kana sa pagpalayo sa iyang kaugalingon sa giilang mga kurakot nga lider ug negosyante.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
