GISUGYOT sa ikaduhang labing-labaw nga opisyal sa Bohol nga angayan nga i-regulate ang pagduwa og lato-lato ilabi na diha sa mga tunghaan aron malikayan ang kasaba nga makadisturbo nalang hinoon sa klase.
Suma pa ni Bise-gobernador Dionisio Victor A. Balite, Ph.D nga mas maayo nga bantayan sa mga ginikanan ang ilang mga anak nga magduwa sa maong matang sa duwaan aron dili na kini madala sa eskwelahan.
Hinoon gipadayag ni BG Balite nga maayo ra nga makasuway usab ang kabataan sa pagduwa niining lato-lato basta anaa lang ang mga ginikanan ug hamtong sa paghatag usab ug pagdisiplina sa kabataan.
Ang bise-gobernador nitug-an nga nakahimo usab siya pagduwa sa lato-lato sa dihang batan-on pa usab siya.
Sa nasayran ni Balite nga wala pay tunghaan sa Bohol nga mipagawas og usa ka memorandum nga nagdili sa mga tinun-an sa pagdala sa maong duwaan sud sa tunghaan. (RTB)
MANDO PAGDAKOP
Nagpaabot pa ang Bohol Provincial Police Office (BPPO) sa kamandoan sa pagsakmit sa lato-lato nga duwaan human nga ang Department of Trade and Industry (DTI) nipahibawo nga angay na nga sakmiton sa gobiyerno ang maong duwaan kay wala kini saktong mga papeles sa pagpagamit niini gikan sa Food and Drug Administration (FDA).
Misikat karon sa tibuok Pilipinas ang duwaan nga lato-lato diin dili lang ang mga bata ang nalingaw, lakip na ang mga hamtong nagduwa na usab niini.
Mga tinun-an imong makita diha sa karsada nga magdala’g lato-lato nga nagpasabot lang nga nalingaw na sila niini.
Apan ang DTI sa kaulohan nipahibawo nga mamahimong kompiskahon sa gobiyerno ang lato-lato tungod kay wala kini sakto nga dokumento gikan sa FDA kon kini luwas ba nga gamiton.
Sigun sa DTI nga kinahanglan nga dunay iisyu nga certificate of product notification ang maong ahensya sanglit wala sila masayod kon unsa nga chemical ang gigamit sa paggama niini ug kon luwas ba kini sa panglawas sa mga bata o ni bisan kinsa.
Ang BPPO nagpaabot sa kamandoan gikan sa Police Regional Office (PRO 7) o ba kaha ordinansa sa lalawigan sa Bohol kon kinahanglan na nga pangbawion ang mga lato-lato.
Matod sa BPPO, andam sila nga mopatuman sa balaod ilabi na kon ilhon ang lato-lato nga ilegal.
“As of now wala pa man hinuon tay nadawat nga directive coming from the national headquarters or higher command. Pero once nga naay ordinansa nga himuon ang atong local nga pangagamhanan, diha-diha dayon mag-coordinate pud ta sa FDA ug magpahigayon ta og operations aning lato-lato,” matod sa usa ka opisyal nga dili lang magpaila.
Wala pa hinuon maka-monitor ang kapulisan sa Bohol nga duna nay nag-away nga mga batan-on tungod lang sa lato-lato sama sa nahitabo sa kaulohan nga naglamoklamok ang mga bata tungod kay nasuya nga ang laing grupo maayong nakaduwa. (RTB)
