ni Wilson Auguis Subrio
P9,997,925.27 ang nadawat sa lungsod sa Anda nga pundo gikan sa Provincial Aid alang sa tuig 2023 alang sa expansion sa Anda Public Market nga nahimutang sa Brgy. Poblacion, nga maghatag og kalambuan sa maong lungsod.
Kini ang gipaambit ni Gobernador Aris Aumentado sa social media, Hunyo 5.
“Gitambongan nato karong adlawa ang Groundbreaking Ceremony alang sa expansion sa Anda Public Market, nga nahimutang sa Poblacion, Lungsod sa Anda,” matud ni Gob. Aumentado.
Ang floor plan sa expansion sa maong merkado anaay kadak-on nga 624 sq.m., ug gipondohan og P9,997,925.27 gikan sa Provincial Aid alang sa tuig 2023.
“Nanghinaot ako nga sa higayon nga mahuman kini, mahatagan ang atong mga mamaligya og dugang espasyo aron makatanyag sa ilang mga produkto ug sa katawhang Andahanon nga adunay dugang kapilian sa ilang pagpamalit,” dugang sa gobernador.
Ang maong kalihukan gitambungan sa mga opisyales sa maong lungsod, ni Gob. Aris, Bise-Gobernador Dionisio Victor Balite ug uban pa.
