MAG-ATUBANG na gyud og tukmang silot ang mga kan-anan nga dili mohatag og tubig mainom ngadto sa ilang mga kustomer.
Kini human unya hingpit nga maaprobahan ang sugyot-ordinansahon nga nagmando sa mga operator og restaurant ug mga kan-anan dinhi sa dakbayan sa Tagbilaran nga mohatag og libreng potable service water sa mga kustomer.
Suma pa sa nangamahan sa maong ordinansahon nga si Konsehal Nerio Butchie Zamora II nga subo kaayo palandungon nga dunay ubang kan-anan nga paugat kaayo ug dili gyud mohatag og libreng tubig mainom.
Matud pa niya nga dili tanang kustomer ang maka-afford sa bottled water.
“Naay mga resto ipapugos gyud ng ilang bottled water, usahay mahal kayo, unsaon nalang kung atong kwarta igo ra i-kaon, matuk-an na hinoon ta kay wa silay tubig mahatag,” saysay pa ni Zamora sa The Bohol Times.
Base sa seksyon 6 sa maong ordinansa, ang City Health Department maoy mangulo sa binuwan nga inspeksyon sa mga kan-anan aron masuta kun nituman ba kini sa ordinansa.
Mosusi usab ang maong departamento sa istado sa tubig pinaagi sa pag-umol og testing kun limpyo ba o dili ang tubig.
Sa higayon nga masuta nga dunay kalapasan nga nahimo, ilaha dayon kining iduso ngadto sa City Legal Office alang sa pagpahamtang og tukmang aksyon.
Gitataw sa maong ordinansahon ni Zamora nga nalakip niini ang mga canteen, food outlets ug ubang matang sa kan-anan.
Ang mga establisamento nga nagtanyag og pagkaon kinahanglan dunay ibutang nga pahibawo nga dunay “Free Service Water”.
Ang makasupak sa maong ordinansa, adunay nagtangag nga multa nga nalatid sa seksyon 8, kini sama sa “warning“ sa unang offense, samtang P3,000 nga multa sa ikaduhang offense, ug P5,000 nga multa ug pagka-suspenso sa business permit alang sa ikatulong offense. (RTB)
