NAKIGTAGBO si Atty Jordan Pizarras sa mga kadagkuan sa Holy Name University nga gipangunahan ni University President Fr. Ruel Lero, SVD ug Dr. Bobong Legitimas kinsa maoy Basic Education Head sa maong tunghaan.
Hatagan og P10,000 lakip ang medalya ang Top Junior High Student samtang tulo ang makadawat og tag P15,000 sa Senior High ug medalya.
Kini gumikan kay 3 ka strands ang maong department.
Ang maong lakang gikalipay ni Fr. Lero ug namahayag nga positibo siya nga sa mga umaabot pang mga katuigan, magmalig-on sila isip “partners in development”.
Giklaro sa manlalaban nga mahimo na kining tinuig nga pagpasidungog sa mga estudyante nga ni-excel sa ilang pagskwela.
Si Atty Pizarras nahuman sa kursong BS Commerce sa Divine Word College nga Holy Name University na karon niadtong 1982 samtang nahuman sa abogasya niadtong 1987 sa San Beda.
Siya ang 4th placer sa ilang klase samtang dunay BAR rating nga 82.95 sa 1987 Bar Examination.
Kini maoy nag-awhag kaniya nga mohatag og Pizarras Award for Excellence. Iyang inahan nga si (+) Conchita M. Pizarras , usa ka retiradong Public School Teacher.
Usa ka manlalaban usab ang iyang amahan nga si (+) Atty. Eufronio Pizarras, ang kanhi Provincial Treasurer sa Bohol.(Kahlil Lester O. Camba)
NANGINLABOT
Nibisita sa buhatan sa Bohol Island State University president Dr. Anthony Penaso si Manlalaban Jordan Pizarras arun sa personal nga pagpapasalamat.
Mahitungod kini sa paspas nga pag-aksyon nila sa suwat nga gipadala sa abogado kabahin sa kadaghang laboratory requirements alang sa mga estudyante.
Giingong mokabat sa dul-ang P5,000 ang tanang mga laboratory requirements nga gihulagway nga “too burdensome” sa bulsa sa mga ginikanan.
Gikalipay ni Manlalaban Pizarras ang maong lakang sa BISU sanglit nagpamatuod kini nga nagpakabana sila sa pagtungha sa mga estudyante.
Suma pa ni Dr. Penaso, ang maong mga rekisitos mao usab ang suliran sa ubang mga campuses maoy hinungdan nga iya kini dayung gipatun-an.
Dugang pa ni Pizarras, naglaraw siya nga mohatag og P1,000/ monthly stipend sa kada Top 2 performing students sa kada BISU Campus.
Dunay 6 ka mga campus ang maong unibersidad matud pa kang Dr. Penaso. Posible pa kini nga mapalapdan ngadto sa 20 ka mga estudyante kon walay mga kabilinggan.
Magpadala ra og pormal nga komunikasyon ang abogado alang sa maong katuyuan.
Ang BISU dunay P800M nga budget ug nisaludo si Pizarras niini pagpamatuod nga gihatagan kini og pagtagad. (Kahlil Lester O. Camba)
