GILUSAD na sa Dakbayan sa Tagbilaran ang Marcoleta Sagip Movement (MSM) nga gitambongan mismo ni SAGIP partylist Rep. Rodante Marcoleta, iyang anak ug Chief of Staff Paolo Marcoleta ug mga kaubanan.
Si Paolo Marcoleta ang National President sa MSM samtang si Elmer Taldo ang Provincial Chairman.
Namahayag siya nga ang mga myembro sa kapunungan maoy mahimong priority nila sa mga ayuda sama sa Assistance in Crisis Situation (AICS), TUPAD ug ilabi na ang mga scholarship grants.
Lakip usab sa maong grupo sila kanhi CDA Administrator Benjie Oliva, Gil Montilla, Albur Mayor Don Ritchie Buates ug kanhi konsehal sa Baclayon nga si Sendoy Guingguing.
Dunay gipahigayong Press Conference didto sa Kew Hotel kon diin gihatagan sa katin-awan ni Cong. Marcoleta ang mga adbokasiya nga iyang gisuportahan.
Kahinumduman nga si Marcoleta, apil sa mga kongresista nga nisuporta nga dili hatagan sa bag-ong prangkisa ang ABS-CBN gumikan sa dili pagbayad sa saktong buhis ug uban pang mga kalapasan.
Dugang pa niini, suma pa sa kongresista nga duol sa iyang dughan ang sektor sa agrikultura sanglit ang iyang amahan usa man ka mag-uuma didto sa Tarlac.
Usa si Marcoleta sa mga personal nga gihangyo ni kanhi presidente Digong Duterte nga molansar pagka senador apan wala nidayun gumikan sa mga nagkadaiyang kakulian. (Kahlil Lester O. Camba)
