GIHANGOP sa Visayas Command ang pagkatudlo ni Vice President Sara Duterte isip Co-Vice Chairperson sa National Task Force to End Local Communist Armed Conflict(NTF-ELCAC) diin nagpabilin ang ilang tinguha nga dili moyuhang ang ilang focused military operations sa Visayas Region.
Si Duterte maoy gitudlo sa maong posisyon atol sa Executive Committee Meeting sa National Task Force to End Local Communist Armed Conflict (NTF – ELCAC) niadtong Mayo 10, pinaagi sa mosyon ni Secretary Eduardo Año, ang National Security Adviser nga giaprubahan sa mga miyembro sa committee.
Ang maong lakang kabahin sa tinguha sa pag recalibrate sa NTF-ELCAC subay na sa kamanduan ni President Ferdinand Marcos Jr.
Suma pa ni Lieutenant General Benedict Arevalo commander sa Viscom nga ilang gidawat ang maong pagtudlo ni Duterte isip Co-Vice Chairperson NTF ELCAC ug padayon ang ilang suporta sa tinguha nga pagpuhag sa mga rebeldeng NPA sa rehiyon
Sukad pa sa pagsugod sa tuig 2023 ang wala’y hunong nga lakang sa Visayas Command ug subordinate units nakamugna og organization vacuum ug sunod sunod nga pagkapukan sa CPP-NPA.
Gikan sa Enero 1 hangtud ning kasamtangang petsa, 58 ka operasyon batok sa armadong grupo ang nahitabo sa Visayas Region.
Miresulta kini sa neutralization sa 98 ka NPA terrorist diin 26 niini ang namatay sa encounter, 65 ang nibalik sa sabakan sa gobyerno ug pito ang nadakpan.
Ang maong neutralized NPA terrorists apil niini ang pipila ka high-profile terrorist leaders lakip si Rogelio Posadas alias Poten, giingong natadong secretary sa NPA’s Komiteng Rehiyon Negros-Cebu-Bohol- Siquijor (KR NCBS) kinsa namatay atol sa armed encounter niadtong Abril 20, sa Barangy Santol, Binalbagan, Negros Occidental.
Samtang moabot sa 134 ka armas ug usa ka 60mm mortar gikan sa CPP-NPA ang nakompiskar sa gobyerno sa maong period.
Si Lt. Gen. Arevalo mitataw nga ang wala’y hunong nga lakang sa VISCOM nasubay sa whole-of-nation approach sa NTF ELCAC.
Giawhag niini ang mga miyembro sa CPP-NPA sa Visayas region nga mobalik na sa gobyerno samtang duna pay higayon. (RTB)
