NABAKUNAHAN na sa siyudad sa Tagbilaran ang kapin sa 50 porsyento sa ilang target nga kabataan nga bakunahan batok sa measles, rubella ug polio.
Gitug-an ni City Health Officer Dr. Jeah Pondoc nga sa kasamtangan moabot na sa 54.88 porsiyento sa ilang target nga mga bata ang nabakunahan batok sa measles ug rubella.
Samtang 52 porsyento sa ilang target nga bata ang nakadawat og oral polio vaccine.
Ang measles ug rubella vaccines ihatag sa mga bata nga nag edad og siyam ka buwan ngadto sa singko anyos samtang ang oral polio vaccine ihatag sa mga bata nga nag-edad og 0 ngadto sa singko anyos.
Gitug-an ni Pondoc nga duna gihapoy mga ginikanan nga nagdumili sa pagpabakuna sa ilang mga anak sa kahadlok nga duna kini mga side effects.
Ang mga health workers mipasabot na sa mga ginikanan sa ka importante sa maong mga vaccines aron malikayan nga masakit sa maong matang sa mga sakit ang kabataan. (RTB)
