MOPAHIGAYON ang Department of Education (DepEd) sa sayo nga rehistrasyon alang sa umaabot nga kindergarten, grades 1, 7, ug 11 sa mga pampublikong tunghaan sa tibuok nasod, sugod niadtong Mayo 10 hangtod sa Hunyo 9, 2023.
Sa usa ka pamahayag karong bag-o, ang Deped nagkanayon nga ang mga magtutungha nga magpa-enroll sa nahisgutang lebel kinahanglang mag-pre-register o moapil sa sayo nga rehistrasyon aron tugotan ang departamento sa paghimo sa gikinahanglang pagpangandam ug pag-adjust sa mga plano alang sa umaabot nga school year 2023- 2024.
“On the other hand, incoming Grades 2-6, 8-10, and 12 learners from public schools are considered pre-registered and do not need to participate in the early registration,” tipik sa pamahayag sa DepEd.
Gipalabi sa Deped ang personal nga transaksyon alang sa pagparehistro apan mahimo usab nga ipatuman sa mga eskwelahan ang pagkolekta sa mga porma sa pagparehistro pinaagi sa ubang mga paagi.
Giawhag niini ang school division superintendents ug school heads nga mangulo sa mga paningkamot sa pagdasig sa mga ginikanan ug mga tigbantay sa pag-apil sa sayo nga pagparehistro.
Ang mga publikong eskwelahan sa elementarya ug sekondarya gitahasan usab sa pag-update o pag-encode kada adlaw sa early registration facility sa Learner Information System (LIS) gamit ang school head o administrator account.
“In addition, the schools may also encode in the Early Registration facility, the prospective enrollees for other grade levels (Grades 2-6, 8-10, and 12) based on the previous school enrollment to get the overall picture of the expected enrollees for the next enrollment,” dason sa pamahayag.
Ang DepEd nag-awhag usab sa mga pribadong tunghaan sa pagpahigayon sa ilang tagsa-tagsa ka early registration activities sa samang time frame. (RTB)
