PATAY ang usa ka lalaki nga gituohang sakop sa New People’s Army (NPA) atol sa engkwentro batok sa mga tropa sa gobyerno sa utlanan sa mga lungsod sa Antequera ug San Isidro niadtong Biyernes sa buntag. Kini ang nasayran ning pamantalaan gikan sa Antequera Police Station.
Matod sa kapolisan sa lungsod sa Antequera, wala pa matino nga ihap sa mga rebelde ang nakig-engkwentro sa mga personahe sa Philippine Army ug Philippine National Police (PNP) Provincial Mobile Force Company (PMFC) mga alas 6 sa buntag.
Ang lawas nga wala nay kinabuhi na-recover sa kapulisan sa Barangay Tabuan, Antequera gipaila nga si Arthur Lucenario aka Jasper, hingkod nga taga lalawigan sa Sugbu.
Matud pa nga wala makakuha ang kapolisan og mga detalye kon giunsa pagsugod ang engkwentro tali sa mga rebelde ug tropa sa PA ug PMFC.
Ang PA wala usab motubag sa mga tawag ug wala’y gipagawas nga pahayag hangtod sa paghimo ning balita kagahapon.
Kini ang ikaduhang gikataho nga panagsangka tali sa pwersa sa estado ug mga rebeldeng NPA sa unang distrito sulod sa duha ka bulan.
Una niini, kaniadtong Marso 10, 2023, labing menos 30 ka mga pamilya sa Barangay Hanapol Norte, Balilihan ang gipabakwit human nag-engkwentro ang mga trooper sa Army ug NPA sa baryo.
Niadtong Disyembre 2022 usab, nag-engkwentro usab ang mga sundalo sa Army ug gidudahang mga rebelde sa unang higayon sa ikaduhang distrito sa lungsod sa San Isidro.
Ang lalawigan sa Bohol, nga kanhi puy-anan sa mga kalihokang gerilya sa komunista, gikonsiderar nga walay insurhensiya sukad niadtong 2010.
Bisan pa, ang mga panagsangka nagsugod sa pagbuto kaniadtong 2019 apan kini natanggong sa mga hinterlands sa ikatulong distrito, labi na ang mga lungsod sa Bilar ug Batuan. (RTB)
