KINAHANGLAN nga i-repackage ug buhion ang turismo sa Bohol sa laing aspeto aron ma-engganyo ang mga Arabong turista sa pagbisita dinhi sa Bohol, nagkanayon si Kongresista Alexie Tutor.
“With Bohol’s tourist travel arrival specifically from UAE for year 2022 which was 241, there is a need to repackage & revive our tourism travel offer to the Arabian Market,” siya miingon.
Si Kongresista Tutor kauban ang iyang bana nga si Candijay Vice Mayor Christopher Tutor, ug magtiayong Governor Aris ug Congresswoman Vanvan Aumentado apil sa delegasyon sa Pilipinas nga gipangulohan sa mga kadagkuan sa Department of Tourism sa Arabian Travel Mart didto sa Dubai World Trade Center sa United Arab Emirates.
Si Cong. Tutor miingon nga ang mga Arabong turista mas gusto og luho ug dili kaayo sa adventure tourism ug kasagaran usab sa mga Arabo sa mga nasud sa Europe manuroy.
“Ganahan na cla ug luxurious ang dating kay deri sa ilaha, luxury jud. Naa cguro but mga 40% ra cguro sa ilaha or less. Naka bantay man gud ko nga mga Arabs deri toa nangadto sagaran sa Europe na travel mart area,” siya miingon.
Tungod niini, matud sa kongresista sa tersero distrito nga kinahanglan nga i-level up ang mga accommodation facilities ug accommodation establishment sa Bohol sama sa mga hotels para madani ang mga turista o tigbiyahean nga nangita sab ug maluho nga turismo.
“We in Bohol as well need to be prepared in our accommodation facilities & establishments; to level-up so we can entice the travelers looking for luxury as well,” si Tutor miingon.
Ang Arabian travel mart, sumala sa magbabalaud, usa ka higayon nga maila kung unsay gusto sa mga turista gikan sa mga nasud sa tunga-tungang sidlakan ug matanyag ngadto sa ubang mga travel operators ang mga tourism destination sa Bohol nga wapa mailhi sama sa lungsod sa Anda.
“Need nato nga ila-ilahon ug maayo ang Arab Market nga maka kuha ta sa target nila sa tourism,” si Tutor midugang sa pagbutyag. (rvo/rt)
