SAKIT UG LUOY PAMALANDUNGON nga anaay katawhang naulipon sa hiwi ug abusadong liderato sa ubang lider.
Kining maong reyalidad nasinati usab sa uban natong kaigsoonan dinhi sa lalawigang Bol-anon.
Anaay kalungsuran nga gidumala lang sa usa ka pamilya sa politiko diin nauwahi na sa mapa sa pag-abante ang ilang mahal nga lungsod.
Walay problema kon gidumala sa usa lang ka pamilya sa politiko o bansagon ang usa ka lugar kon anaay tataw nga kalambuan ug kauswagan.
Apan mas maayo nga makapili usab og bag-ong liderato, kay sama sa sud-an, mapul-an usab ang katawhan.
Nganong ingana man ang nahitabo sa ilang lungsod?
Una, kay wala sila kapili og tarong ug kasaligang mga lider.
Lagmit wala sila ma-edukar sa maayong klase sa pang-gobyerno.
Ikaduha, nagunitan sila sa li-og maong maglisod og pili og mga bag-ong nawong sa lider.
Tungod kay gipalit o gibayran ang ilang halangdong boto panahon sa Eleksyon.
Ug ikatulo, tungod kay dili sila abli (dili open-minded) nga makapili og bag-ong henerasyon sa mga lider.
Nasobraan ang ilang pagyukbo, pagdayeg o pagsalig sa mga karaang lider nga alang kanila, mao na’y pinakamaayo ilabina kon propresyonal o grabe ang educational background.
Ang pangutana: maayo ba og track record nga padayon man nga gisuportahan? Kasagaran, dili.
Ang dakong problema sa ubang kalungsuran karon mao ang pagka-diktador ug mahulog nga komunista ang ilang mga lider.
Tungod kana kay nagbaton og tumang kahadlok ang katawhan sa maong lungsod ngadto sa ilang mga lider.
Ug ang pait, tungod kay walay alamag ang katawhan sa kon unsa na ang dagan sa pang-gobyerno sa ilang haring lungsod.
Ang mas grabe, gipugngan sa ilang mga lider kutob sa mahimo nga dili mogawas ang tin-aw ug busagak nga kamatuoran.
Ang media dako kaayo og papel sa pagpagawas sa hul-os nga kamatuoran apan subo hunahunaon nga daghang sakop sa media nga talawan ug naulipon sa suborno sa mga kurakot nga politiko.
Tak-om ang ilang baba ug mahadlok — mahadlok kay napalit na man ang ilang baruganan ug prinsipyo.
Maong dili na ikatingala nga daghang nagdasa nga mga kurakot kay daghang walay pagpakabana.
Ikaw Sano ug Sana, unsa may inyong gihimo aron ma-reporma ang bati nga pagdumala diha sa inyong lungsod? Ipadayon ba gihapon kana o putlon na sa sunod Piniliay? Kamo ang mag-igo.
Ang maayong kaugmaon sa lungsod mag-agad ra gihapon sa pagpili og ligdong nga mga lider, nga walay nagpahiping adyenda o interes.
Kining lindog: ‘Tingog sa Kabatan-onan’, abli sa inyong mga sugyot ug komento. Mamahimo kana ninyong mapaabot pinaagi niining akong numero 09638753562 o Gmail: subriowilsonauguis@gmail.com o sa Facebook ug Messenger account: Wilson Auguis Subrio.
Modawat lamang og seryoso ug dili binuang. Mag-amping kita, mga Bol-anon!
