GIHUHUNGIHONG nga Level Two na pud kuno ta, ang Covid-19 abi nakug nikagiw na. Pastilan, wa pa gyud diay kining pandemya mahuman, busa sa balak atong pahinungdan:
O Corona, Corona
De Las Islas Filipinas
Atong nasud ginganlan
Tungod kang Haring Felipeng
Sa corona gipurong-purongan;
Labing unang mahistrado sa Korte Suprema
Nga gipaphas pangatungdanan, si Renato Corona;
Nanimawos ang iyang mga kaalyado
Gihuboan sa iyang corona si Maria Lourdes Sereno;
Karon kita nag-antus
Ning pandemia sa Corona nga virus;
Physical distancing ug lockdown
Maoy gidangat ning kalibutan intawn;
Panahon sa quarantine atong pahimuslan
Kinabuhi hinuklogan, mga sala hinulsulan;
Pag-ampo ug pag-amping
Maoy taming ug hinagiban;
O Ginoong Dios namo
Ikaw ray among kadangpan;
Kay ang tawhanong kaalam
Adunay kinutuban.
Ato kining gitagik niadtong nangaging katuigan, isip pamalandong ning kahimtang nga atong gidangatan. Mao kini ang akong dalit kaninyo pag-usab karong semanaha. Hinaut nga makapuypuy sa inyong kahingawa.
