ANG konseho sa Tagbilaran City muhangyo sa Department of Education (Dep-ED) alang sa pagsusi sa posibilidad nga mag-online classes ang mga estudyante panahon sa “hot summer season.”
Samtang ang ubang ginikanan mas ganahan nga ibalik ang naandang summer break panahon sa ting-init sama sa kaniadto.
Sa resolusyon nga pangamahanan unya ni Konsehal Nerio Butchie Zamora II kini miingon nga grabe ang kaninit karong panahona ug taas kaayo ang risgo sa heat stroke ug uban pa nga makadaut sa panglawas sa mga estudyante.
“Dili ta magkompyansa nga painitan atong kabataan kay hilabihang ka-delikado,” matud pa ni Zamora.
Nahisgutan ni Zamora ang pahimangno sa Philippine Atmospheric, Geophysical and Astronomical Services Administration, (PAGASA) nga kinahanglan magmatngon ang katawhan gumikan kay ang heat index kay moabot og 31 ngadto sa 52 degrees celsius panahon sa summer season.
“The extreme heat will greatly affect the performance of the students as they can be experiencing dehydration and heat stress, heat exhaustion or heat stroke,” tipik sa unod sa resolusyon.
Masaligon ang konsehal nga makakuha og positibong tubag sa DepEd.
Laing resolusyon nga ipasar ni Zamora sa konseho mao ang paghangyo gihapon sa mga kadagkoan sa eskwelahan nga labing maayo nga likayan lang una ang outdoor activities karong panahona.
Kalabot usab sa sports activities sa mga tunghaan, nasayran ni Zamora nga dunay mga plano ang DEPED niini ilabi na sa oras alang sa pagduwa nga dili kaayo tantong mabulad sa init ang mga bata.
Sa pikas bahin, pipila sa mga magtutudlo nga nahinabi ning pamantalaan uyon nga ibalik sa buwan sa Abril ug Mayo ang school break sa mga tinun-an.
Nagkanayon sila nga ilang nakita ang sitwasyon sa mga kabataan diha sa ilang mga lawak saringan nga grabe ang kainit sa panahon.
Gani ang mga magtutudlo mu-abli sa mga bintana ug paandaron ang tanang electric fan.
Ang pampublikong tunghaan magsugod ang school break karong buwan sa Agosto ug Septembre. (RTB)
