LIMA ka punto ang nakit-an sa Bureau of Fire Protection (BFP) nga kinahanglan pa nga trabahoon sa bag-ong Kapitolyo, aron mahimo kining luwas puy-an sa publiko ug basin aron mas sayun maproseso na ang occupancy permit niini.
Sa labing bag-o nga Fire Exit Drill nga gidumala sa BFP dungan sa pagsulod sa Fire Prevention Month, nakita sa mga tinugyanan sa BFP ang lima ka mga pagkuwang nga mahimong kina-ingan nga dili luwas ang bag-ong Kapitolyo kon may sunog nga mahitabo karon dayon.
Matud pa sa taho ni Fire Senior Superintendent Raul Bustalino, subay sa Fire Safety Inspection sa bag-ong Kapitolyo, namatikdan sa mga tinugyanan nga walay nakaplastar nga fire exit route plan ug mga muamag nga mga pahibalo aron magtudlo sa mga biktima kon diin moagi, samtang wala usab sila makakita sa emergency evacuation plan sa matag andana sa bag-ong building sa Kapitolyo.
Didto sa tigum sa Provincial Disaster and Risk Reducation management Council niadtong Marso 31, nabutyag usab nga dili igo ang pwersa sa tubig gikan sa water sprinkler system sa Kapitolyo, nga kinahanglang makaabut sa 100 psi.
Ang sidlit sa tubig gikan sa water sprinklers, naa lamang sa 40 PSI, matud sa BFP.
Depektoso usab ang fire detection ug alarm system sa Zone 1 sa nahisgutang building, gawas pa ga gikinahanglan aron makakuha sa occupancy certificate ang Kapitolyo, maghimo kini og subsob nga schedule sa fire exit drills ug ang pag-organisa sa Volunteer Fire Brigade alang sa Kapitolyo.
Kahinumduman nga una na nga gipangutana ni Bise Gob Dionisio Victor Balite kon aduna na bay gihutang occupancy permit ang Kapitolyo kay dugay ra man kini nga gihimong opisyal nga hawanan sa kagamhanang probinsyal ug gipasudlan ug nagdawat sa mga bisita ug kliyente.
Apan, matud ni Engr. Teodoro P. Estoque sa City Engineer’s Office, samtang may nakuha na nga Permit to Construct ug giisyu na sa Kapitolyo pagsugod sa pagtukod niini niadtong Nobyembre 7, 2017, human kini mahukman nga puy-an na sa mga buhatan, gihimo ang building inspection niadtong Oktubre 23, 2018 human sa una nga Fire Safety Inspection Certificate nga natugyan human masunod sa Kapitolyo ang mga pagkuwang niini niadtong Agosto 20, 2020.
Ug samtang ang Office of the City Building Official nakadawat na sa kopya sa Fire Safety Inspection Certificate, wala pa niini madawat ang mga gikinahanglan nga pagmatuod nga gihimo na sa Kapitolyo ang paghipno aron matubag ang mga kakuwangon.
Subay sa National Building Code, kon walay occupancy permit ang usa ka lugar, dili gyud unta kini angay pasudlan sa mga tawo.
Sa katungod sa Kapitolyo, matud ni General Services Officer Engr. Glen Doloritos, ila na nga gitugyan ang pagproseso sa Occupancy permit sa Kapitolyo ngadto sa pribado nga kontraktor, ang BM Marketing.
Si Wilmar Beato, tagdumala sa BM- Marketing mikompirmar usab nga nagsige pa sila og proseso ang sa occupancy permit, samtang wala pa sila masayud kon kinsa sa Kapitolyo ang mopirma sa mga papeles alang sa application niini, sa katungod sa Bohol.
Niini, mingtambag ang Kapitolyo ngadto sa kontraktor nga maghimo og timeline sa ilang buhatonon sulod sa usa ka buwan aron mapa-una ang occupancy permit application kay dugay ra kining gikinahanglan. (RAHC/PIA7 Bohol)
